Qyzylordanyń «Báıterek» shaǵyn aýdanynda 600 oryndyq mekteptiń qurylysy bastaldy
QYZYLORDA. QazAqparat – Búgin Qyzylorda oblysynyń ákimi Gúlshara Ábdiqalyqova «Báıterek» turǵyn aýdanyndaǵy 600 oryndyq mekteptiń qurylys jumystaryn kórip, jańa mekteptiń kirpishin qalaý jumystaryna atsalysty. Sharaǵa QR Parlamenti Májilisiniń depýtattary Balaıym Kesebaeva men Natalıa Jumadildaeva qatysty, dep habarlaıdy QazAqparat.
Oblys ákimi mektep qurylysynyń jumysyn baqylap, bilim oshaǵynyń zamanaýı túrde iske asyp, oqýshylardyń ıgiligine baǵyttalýy qajettigin atap ótti.
4 jyl buryn Qyzylorda-Jezqazǵan trassasynyń boıynan 6 600 otbasyna arnalǵan «Báıterek» shaǵyn móltek aýdany ashylǵan. Búginde móltek aýdanynda 70 otbasy qonystansa, atalǵan otbasylardyń mektep jasyndaǵy oqýshylary qala ortalyǵyndaǵy mektepterge qatynap bilim alyp keledi. Osyǵan oraı 600 oryndyq mekteptiń qurylysyn salýda jobalyq-smetalyq qujattarǵa sáıkes jumys bastalyp ketti.
Mektep 2020-2021 jyldarǵa arnalǵan Jumyspen qamtýdyń jol kartasy aıasynda iske asýda. Bilim oshaǵyn salýǵa 1,2 mlrd teńge qarjy bólingen. Jańa mektep jyl aıaǵyna deıin paıdalanýǵa berilmek.
Aldaǵy 3 jyldyń josparyna sáıkes «Báıterek» shaǵyn móltek aýdanynda mektep jasyndaǵy oqýshylar sany 1 500-ge jýyq bolady dep josparlanýda. Jańa mektep oryn tapshylyǵy máselesin sheshedi.
Sharada bilim salasynyń ardageri Myltyqbaı Báıimbetov «jańa bilim uıasy elge belgili azamattardyń túlep ushatyn ozyq oqý ordasyna aınalady» dep bata berdi.
Aıta keteıik, qazirgi tańda oblysta 8 mektep salynyp jatyr. Oqý jylyna Qyzylorda qalasynan jáne Jalaǵash aýdanynan 2 mektep qurylysy paıdalanýǵa beriledi dep josparlanyp otyr. Sonymen qatar, 4 mekteptiń qurylysy júrgizilýde. Onyń ishinde Aral aýdany, Sekseýil kentindegi 300 oryndyq mektep jyl sońynda aıaqtalmaq.
