Qyzylordanyń bas sanıtar dárigeri qaramaǵyndaǵylardan para alyp kelgen

NUR-SULTAN. QazAqparat - Qyzylorda oblysy tutynýshylar quqyǵyn qorǵaý departamenti basshysynyń mindetin atqarýshy - oblystyń bas memlekettik sanıtar dárigeri qaramaǵyndaǵy dárigerlerden júıeli túrde para alǵanyn moıyndady, dep habarlaıdy QazAqparat Sybaılas jemqorlyqqa qarsy is-qımyl Ulttyq bıýrosyna silteme jasap.

«Sybaılas jemqorlyqqa qarsy is-qımyl ulttyq bıýrosynyń Qyzylorda oblysy boıynsha departamenti Tutynýshylar quqyǵyn qorǵaý departamenti basshysynyń m.a. - oblystyń bas memlekettik sanıtar dárigeriniń paraqorlyq faktisin anyqtady. Ol qyzmettegi jalpy qamqorlyǵy úshin qaramaǵyndaǵy aýdandyq bólimshelerdiń basshylarynan 30-50 myń teńge aralyǵynda júıeli túrde para alǵany úshin kúdikti atandy», - dep málimdedi QR Sybaılas jemqorlyqqa qarsy is-qımyl Ulttyq bıýrosynyń baspasóz hatshysy Arman Berdalın elordada ótken brıfıngte.

Sondaı-aq, kúdikti sanıtarlyq talaptarǵa sáıkestik týraly oń sheshim shyǵarý úshin jeke balabaqsha ókilinen 150 myń teńge somasynda para alǵan.

«Kúdikti kinásin tolyq moıyndady. Tergeý jumystary jalǵasýda», - deıdi Arman Berdalın.