Qyzylordanyń balyq ónimi Eýropaǵa eksporttalady
Oblys boıynsha balyq sharýashylyǵyna mańyzy bar Kishi Aral teńizi men 207 kól tizimge engizilgen. Jergilikti azamattar atalǵan sý aıdyndary arqyly balyqtyń 18 túrin aýlaýǵa kóńil bólip otyr. Óńirde jyldyq qýattylyǵy 12,5 myń tonna bolatyn 9 balyq óńdeý zaýyty bar. Olardyń arasynda 4-i eýropalyq sapa standartyna sáıkestigin rastaıtyn «Eýrokod» sanyn alýǵa qol jetkizdi.
«Bıyl alǵashqy jartyjyldyqta 2 930 tonna balyq aýlanǵan. Ol ótken jylmen salystyrǵanda 21 paıyzǵa artyq. Jyl basynan beri 2 682 tonna balyq ónimdi 7 shet memleketterge eksporttalǵan. Bul kórsetkish ótken jylmen salystyrǵanda 4 paıyzǵa ósti. Araldyń balyq ónimderi Reseı, Qytaı, Germanııa, Polsha, Nıderlandy, Grýzııa, Lıtva elderine naryqqa shyǵarylýda», - dep málim etti Qyzylorda oblysynyń tabıǵı resýrstar jáne tabıǵat paıdalanýdy retteý basqarmasynan.
Aımaqta balyq sharýashylyǵynyń damýyna alǵashqy kezeńi júzege asqan «Syrdarııa ózeniniń arnasyn retteý jáne Aral teńiziniń soltústik bóligin saqtap qalý» jobasynyń paıdasy ushan-teńiz. Endigi kezekte Kókaral bógetine keletin sýdy jınaqtaýdy jolǵa qoıý oılastyrylýda. Jobanyń ekinshi ekinshi kezeńinde sý kólemin molaıtý josparlanyp otyr. Nátıjesinde ol óńirdegi balyq sharýashylyǵynyń damýyna óz yqpalyn tıgizedi.
Jalpy, Kókaral bógeti aımaqtaǵy balyq sharýashylyǵynyń damýyna oń jaǵdaı týǵyzdy. Sonyń nátıjesinde búginde balyq aýlaý kólemi 0,4 myń tonnadan 7 myń tonnaǵa deıin artty. Sondaı-aq, ol bekire tuqymdas balyqtardy ósirýge qolaıly jaǵdaı jasady. Sondaı-aq, teńizdegi sýdyń kólemi 15,6 mln tekshe metrden 27,1 mln tekshe metrge deıin ulǵaıdy.
Qazirgi tańda Aral balyqshylary jylyna jeti myń tonnadaı balyq aýlasa, onyń eki myń tonnasyn eksporttaıdy.
