Qyzylordanyń áleýmettik nysandary jylý maýsymyna saqadaı saı tur
QYZYLORDA. QazAqparat - Syr óńirindegi áleýmettik nysandar qysta jylýdan qınalmaıdy. Aldaǵy jylý maýsymyna bul mekemeler tolyqtaı ázirlengen, dep habarlaıdy QazAqparat tilshisi Qyzylorda oblystyq ákimdiginiń baspasóz qyzmetine silteme jasap.
Bıyl oblys ákimi Qyrymbek Kósherbaevtyń tapsyrmasyna sáıkes jylý berý maýsymyna daıyndyq boıynsha oblystyq shtab quryldy. Bul baǵytta is-sharalar jospary bekitildi.
Qyzylorda oblysynyń energetıka jáne turǵyn úı-kommýnaldyq sharýashylyq basqarmasynyń bastyǵy Medet Ýsaın jylý berý maýsymyna daıyndyq barysy oıdaǵydaı ekenin aıtady.
«Aldaǵy jylý berý maýsymyna daıyndyq jumystary bekitilgen is-sharalarǵa sáıkes júrgizilýde. Onyń ishinde «Qyzylorda jylýelektrortalyǵy» MKK №6, 9 bý qazandyqtaryna, №3, 6 gaz týrbınalyq qondyrǵylaryna, «Qyzylorda ońtústik jylý ortalyǵy» fılıaly men «Qazaly Temirjoljylý» qazandyqtaryna kúrdeli jáne aǵymdaǵy jóndeýdiń basym bóligi oryndaldy. «Nurly jol» baǵdarlamasymen 8 joba boıynsha 7 shaqyrym jylý jelilerine kúrdeli jóndeý de nazardan ys qalǵan joq», - dedi Medet Ýsaın.
Al «Qyzylorda ońtústik jylý ortalyǵy» fılıalynyń shatyryna kúrdeli jóndeý atqarylyp jatyr. Ol 10 qazanda aıaqtalady. «Qyzylorda elektr taratý toraptary kompanııasy» AQ-nyń elektr jelileri men transformatorlyq stantsııalaryna kúrdeli jáne aǵymdaǵy jóndeý jumystary 94%-ǵa oryndaldy.
Jylý berý maýsymyna daıyndyq boıynsha áleýmettik nysandardyń 100 paıyzyna jáne kishi qazandyqtardyń 97 paıyzyna jóndeý jumystary júrgizildi. Sonymen qatar, ortalyqtandyrylǵan jylý júıesine qosylǵan kópqabatty turǵyn úılerdiń 96% jylý maýsymyna daıyn (743 úıdiń 713-i, qalǵan 30 kópqabatty turǵyn úıdiń ójirilerin jylý júıelerine qosýǵa daıyndaý kerek).
Oblys ákimdiginiń apparattyq otyrysynda aımaq basshysy áleýmettik nysandar men turǵyn úılerdi jylýmen qamtamasyz etý máselesin erekshe nazarǵa alýdy tapsyrdy.
Atap óteıik, aldaǵy jylý berý maýsymynda áleýmettik-mádenı nysandarǵa 28 myń tonna kómir men 25 myń tonna suıyq otyn qajet. Al jergilikti turǵyndardyń qajettiligi - 207 myń tonna.
