Qyzylordalyqtardyń 72,7 paıyzy vaktsınanyń birinshi komponentin aldy

NUR-SULTAN. QazAqparat – Qyzylorda oblysynda koronavırýsqa qarsy vaktsına alý protsesi qarqyndy júrip jatyr. Búginde oblys turǵyndarynyń 72,7 paıyzy vaktsınanyń birinshi komponentin alǵan. Bul týraly oblys ákiminiń orynbasary Baljan Shámenova málim etti, dep habarlaıdy QazAqparat tilshisi.

«Oblysta ujymdyq ımmýnıtetti qalyptastyrý maqsatynda ekpe alý qarqyndy júrip jatyr. Búginde vaktsına alýǵa ruqsaty bar 291 237 adam ekpeniń 1-shi komponentin aldy. Bul óńir halqynyń 72,7 paıyzyn quraıdy. Jáne 243 425 adam vaktsınanyń 2-shi komponentin alyp, 60,7 paıyzdy qurap otyr. Oblys aýmaǵynda 103 vaktsına alý beketi jumys istep tur, oǵan 133 dáriger jáne 89 qosymsha maman tartyldy», - dedi B. Shámenova OKQ-de ótken baspasóz máslıhatynda.

Odan bólek, spıker óńirdegi jalpy epıdahýalǵa toqtalyp ótti.

«Búginde bizdiń oblys «sary aımaq» qatarynda. Óńirde koronavırýs juqtyrǵan 17 247 adam tirkelse, onyń 91 paıyzy jazyldy. Sol sııaqty naýqastarǵa arnalǵan 1160 tósek-oryn bar, onyń ishinde reanımatsııalyq tósek-oryn sany 135, qazir ondaǵy júkteme kólemi 30 paıyzdy qurap otyr. Epıdemıologııalyq ahýal ýshyqqan jaǵdaıdy tósek-oryn sanyn 3200-ge deıin ulǵaıtýǵa múmkindik bar», - deıdi ol.

Sondaı-aq, ákim orynbasary oblysta dári-dármek pen medıtsınalyq qural-jabdyqtyń 2 aılyq qory jasaqtalǵanyn tilge tıek etti.

Buǵan deıin habarlaǵanymyzdaı, atalǵan oblysta 3 myńnan astam nysan «Ashyq» júıesimen jumys istep tur.

Aıta ketsek, Qyzylorda oblysynda oqý jyly bastalǵaly 200-den astam oqýshy koronavırýs juqtyrǵan.