Qyzylordalyqtar jolaqyny elektrondy aqshamen tóleıtin bolady
QYZYLORDA. QazAqparat - Qyzylordalyqtar avtobýsta jolaqysyn elektrondy aqshamen tóleıtin bolady. Jańa júıeni oblys ákimdiginde ótken májiliste Ortalyq Azııadaǵy IBA Group kompanııasynyń dırektory Mıhaıl Býnas tanystyrdy, dep habarlady QazAqparat tilshisi.
IBA Group - Ortalyq jáne Shyǵys Eýropanyń tasymaldaý qyzmetindegi jetekshi kompanııalardyń biri. Avtomattandyrylǵan baǵdarlamany eń áýeli Mınskide ázirlep, qoldanysqa engizgen. Búginde mundaǵy avtobýs, trolleıbýs, tramvaı, metro men qala mańyndaǵy elektrıchkalar atalǵan júıemen jumys isteıdi. Jolaýshylar jolaqyny Mifare Plus tehnologııasynyń bazasyndaǵy iCard ámbebap smart-kartasymen tóleıdi. Smart-kartada onyń ıesine tıesili jeńildikter týraly aqparat kórsetiledi. Aqshany bank arqyly da, termınal arqyly da toltyrýǵa bolady.
"Júıege túrli saǵatta jáne túrli baǵyt boıynsha jolaýshylar aǵymyna baqylaý jasaıtyn analıtıkalyq baǵdarlama ornatylǵan. Salonǵa kirgen kezde kondýktor «qoıandarǵa» qýlyǵyn iske asyrýǵa múmkindik bermeı, jolaqyny kondýktor jaqyndaǵannan keıin tóleýi úshin kartochkany valıdatorǵa jaqyndatyp, onyń jumysyn buǵattaıdy. Tekserýdi aıaqtaǵan soń baqylaýshy óz kartasyn qaıtadan valıdatorǵa jaqyndatyp, buǵatyn alyp tastaıdy", - dedi Mıhaıl Býnas.
Qyzylorda qalasynyń ákimdigi qoǵamdyq kólikterdegi elektrondy tólem júıesin memlekettik-jekemenshik áriptestik negizinde júzege asyrmaq.
