Qyzylordalyqtar zańsyz saqtaýdaǵy qarýlary úshin 15 mln teńge alady
ASTANA. QazAqparat - Qyzylorda oblysynyń turǵyndary zańsyz saqtalyp kelgen 264 atys quralyn erikti túrde tapsyrdy.
Bul týraly QazAqparat HAA tilshisi oblystyq ІІD silteme jasap habarlady.
Qoǵamdyq qaýipsizdikti qamtamasyz etý, atys qarýy men jarylǵysh zattardy qoldana otyryp jasalatyn qylmystar men quqyq buzýshylyqtardy aldyn alý maqsatynda 2017 jylǵy 10 sáýirden bastap respýblıka aýmaǵynda halyqta zańsyz saqtaýdaǵy atys qarýyn, oq-dáriler men jarylǵysh zattardy ótemdi túrde satyp alý aktsııasy júrgizilip jatqany belgili.
Aktsııa bastalǵan ýaqyttan beri Qyzylorda óńiriniń turǵyndarynan 264 atys qarýy, onyń ishinde 20 dana ıir oıyqty, 244 tegis uńǵyly atys qarýy qabyldandy.
Atys qarýyn erikti túrde tapsyrǵandarǵa aqshalaı syıaqy berý úshin respýblıkalyq bıýdjetten Qyzylorda oblysyna 15 mıllıon teńge bólindi.
