Qyzylordalyqtar memlekettik qyzmetterdi saýsaq izimen ala bastady

ASTANA. QazAqparat - «Azamattarǵa arnalǵan úkimet» memlekettik korporatsııasy memlekettik qyzmetterdi alýdyń bıometrııalyq ádisin Qyzylordada engizdi. Munyń aldynda atalmysh ádis Astana jáne Almaty qalalarynda qoldanyla bastaǵan bolatyn, dep habarlaıdy QazAqparat.

Endi qyzylordalyqtar jeke basyn rastaıtyn qujatsyz-aq mekenjaı men jyljymaıtyn múlikke tirkelgen quqyqtar týraly anyqtamalardy saýsaq izin paıdalana otyryp ala alady. Ol úshin burynǵydaı elektrondy tsıfrlyq qoltańba nemese jeke kýáliktiń qajeti joq. Jobaǵa qatysý úshin azamattardan oń jáne sol qoldarynyń suq saýsaqtarynyń izderi talap etiledi. Búgingi tańda búkil álemde qoldanylatyn halyqaralyq standarttarǵa sáıkes, bıometrııalyq derekter bazasyna málimetterdi operatordyń kómegimen bas-aıaǵy 5 mınýttyń ishinde engizýge bolady.

Mamandardyń aıtýynsha, jańa júıe azamattardyń derbes derekteriniń qorǵalýyn kúsheıtedi, óz betinshe alynatyn qyzmetter sanynyń artýyna áser etip, bógde azamattardyń jalǵan anyqtama alý faktilerin boldyrmaıdy.

Tanystyrylym barysynda 100-ge jýyq qyzylordalyq bıometrııalyq derekter júıesine tirkelip, memlekettik qyzmet alyp kórdi.

Aıta keteıik, memlekettik korporatsııa bıometrııalyq servısti ótken jyldyń jeltoqsan aıynda iske qosty. Bıometrııa jobasy qyrkúıek aıyna deıin ózge qalalarda da júzege asyrylady.