Qyzylordalyqtar maldaryn kólik qaǵyp ketý jaǵdaılaryna alańdaýly
QYZYLORDA. QazAqparat - Qyzylorda oblysynda respýblıkalyq mańyzy bar avtojoldar boıynda mal qaǵý derekteri alańdatyp otyr. Osyndaı oqıǵalardyń saldarynan adam ólimi de bolǵan, dep habarlaıdy QazAqparat tilshisi.
Sońǵy ýaqytta avtojoldar boıynda maldardyń qaraýsyz jaıylyp, jolǵa shyǵyp ketýi saldarynan túri apatty jaǵdaılar týyndap otyr. Ótken jyldyń ózinde respýblıkalyq mańyzy bar avtojoldar boıynda 53 mal qaǵý deregi bolǵan.
«Osynyń saldarynan 2 adam qaza bolsa, 7 adam ártúrli dene jaraqattaryn alǵan. Al, 2018 jyldyń basynan 24 mal qaǵý deregi tirkelip, onyń ishinde 1 adam dene jaraqatyn alǵan», - deıdi oblystyq ishki ister departamenti baspasóz qyzmetiniń basshysy Gúljahan Qaıyrbergenova.
Onyń sózinshe, búgingi kúni tártip saqshylary úı janýarlarynyń áreketinen bolyp jatatyn jol-kólik oqıǵalarynyń aldyn alý maqsatynda tıisti is-sharalardy qolǵa alǵan. Qyzylorda OІІD-niń usynysymen jáne aýyl ákimderiniń qoldaýymen respýblıkalyq mańyzy bar avtojoldar boıynda mal ıeleri úı janýarlaryna jaryq (sáýle) shaǵylystyratyn qurylǵylar ornatyp jatyr. Qazir olardyń sany 4 myńnan asty.
