Qyzylordalyqtar koronavırýspen kúres jóninde 400-100 nómirine habarlasa alady
NUR-SULTAN. QazAqparat - Qyzylorda oblysynda koronavırýs ınfektsııasymen kúres boıynsha call-ortalyq jumys isteıdi, dep habarlaıdy QazAqparat.
Bul týraly Qyzylorda oblysynyń ákimi Gúlshara Ábdiqalyqova «Habar 24» telearnasynda aıtyp berdi.
«Oblystyq tótenshe jaǵdaılar jónindegi komıssııanyń janynan jedel shtab quryldy. Mamandar táýlik boıy koronavırýs ınfektsııasymen kúres sharalaryn uıymdastyrý jáne aqparattardy taldaý jumystaryn atqarýda. Turǵyndarmen keri baılanys júıeli ornatylǵan. Óńir turǵyndary tolǵandyrǵan suraqtary boıynsha 400-100 call-ortalyǵyna habarlasa alady», - dedi G. Ábdiqalyqova.
Sonymen birge, ákim Prezıdent Qasym-Jomart Toqaevtyń tapsyrmasymen áleýmettik osal top ókilderine, tabysynan aıyrylǵan azamattarǵa, kópbalaly analarǵa, jalpy jaǵdaıy tómen otbasylarǵa kómek kórsetiletinin eske saldy.
«Osy baǵytta aımaqta tıisti sharalar qolǵa alynyp, muqtaj jandarǵa áleýmettik qoldaý kórsetilý bastaldy. Qıyn-qystaý kezeńde jumyla júk kóteretin kez keldi. Sondyqtan barsha Syr jurtyn sanıtarlyq talaptardy oryndap, shekteý tártibin múltiksiz oryndaýǵa shaqyramyn», - dedi Gúlshara Ábdiqalyqova.
Aıta keteıik, qazirgi ýaqytta oblys boıynsha ınfektsııa juqtyrǵandar sany 26-ǵa jetti. Onyń ishinde Qyzylorda qalasynda - 6, Jańaqorǵan aýdanynda - 16, Qarmaqshy aýdanynda - 2, Shıeli aýdanynda - 2 oqıǵa tirkelgen.
Karantınge jabylǵan Qyzylorda qalasy men Jańaqorǵan aýdanynda blokbeketter qoıyldy.
Іndettiń aldyn alý jáne joıý sharalaryn júrgizý úshin Qyzylorda oblysynyń densaýlyq saqtaý basqarmasyna 104 mln teńge bólindi.
