Qyzylordalyqtar Qońyr áńgime dástúrin jandandyryp jatyr

QYZYLORDA. QazAqparat - Qazaqta ilgeriden beri qońyr áńgime degen taǵylymǵa toly erekshe dástúr bolǵan. Qyzylorda oblystyq mádenıet jáne sport basqarmasy osy kóne úrdisti jandandyrmaq, dep habarlaıdy QazAqparat.

«Búginde osyndaı keshti aımaqta uıymdastyrýdy qolǵa aldyq. Sebebi qazaqtyń sózindegi qońyrlyq – tyńdaǵan adamǵa taǵylym beredi», - dep jazdy vedomstvodan.

Ondaǵy málimetterge qaraǵanda, kezekti rýhanı keshtiń qonaǵy Qazaqstannyń eńbek sińirgen qaıratkeri, «Parasat» ordeniniń ıegeri Almas Almatov boldy. Al, «qońyr áńgime» keshiniń turaqty moderatory - aıtysker aqyn Muhtar Nııazov.

«Altynnyń qymbaty – azdyǵynda» demekshi, qara sózdi bıik sanaǵan halyq «Dostyq» úıinde bas qosty. Júz jyraý shyqqan mekenniń perzenti Almas Almatov qońyr áńgimeni tyńdaýǵa kelgen halyqty rýhanı toq qyldy. «Qazyna» atty dastanyn dúıim jurtqa áńgimelep, ázil aralas maǵynaly keshti órbitti», - delingen jazbada.

Buǵan qosa, jıynǵa halyqaralyq dárejedegi sport sheberi Tımýr Sypataev qatysyp, kez kelgen er-azamattyń qolynan kele bermeıtin ónerin pash etti. Sondaı-aq, syrboıylyq sańlaqtar da qońyr áńgimemen birge, qońyr únmen án áýeletip, sahnada óner kórsetti.