Qyzylordalyqtar Konstıtýtsııa kúnin sporttyq jarystarmen atap ótti
ASTANA. QazAqparat - Memlekettik mereke sanalatyn Konstıtýtsııa kúni merekesi Syr óńirinde jan-jaqty atalyp ótti, dep habarlaıdy oblys ákiminiń bakspasóz qyzmeti.
Qyzylorda qalasynda mereke kúnderi túrli sharalar uıymdastyryldy. Solardyń eń aýqymdy sharasy sporttyq saıystarǵa 3 200 adam qatysty. Shara marafonmen bastaldy, qatysýshylar Taǵzym alańynan Ortalyq alańǵa deıingi aralyqty júgirip ótti. Olar - memlekettik mekeme qyzmetkerleri, qala turǵyndary, eriktiler jáne belsendi jastar. Jeńimpazdar alǵys hattarmen jáne medaldarmen marapattaldy.
Sporttyq jarystarǵa qatysýshylardy Qyzylorda oblysynyń ákimi Qyrymbek Kósherbaev Konstıtýtsııa kúni merekesimen quttyqtap, sáttilik tiledi.
«Qurmetti jerlester, osy múmkindikti paıdalana otyryp, Sizderdi barshamyz úshin qasterli mereke-Konstıtýtsııa kúnimen shyn júrekten quttyqtaımyn! Atazańnyń arqasynda Táýelsiz elimiz shırek ǵasyrda tolaıym tabystarǵa qol jetkizdi. Ata zańymyzben ata dástúrimizdi jalǵastyryp kele jatyrmyz. «Esim hannyń eski joly», «Qasym hannyń qasqa joly», Táýke hannyń «Jeti jarǵysynan» bastaý alatyn Ata zań jıyrma birinshi ǵasyrdyń syn-qaterlerine laıyqty jaýap beretin basty qujatymyzǵa aınaldy. Elbasymyz N.Á.Nazarbaevtyń sarabdal saıasatynyń arqasynda elimizde turaqtylyq, birlik bar. Bul - tabysty damýymyzdyń negizgi kepili»,- dedi oblys ákimi Q.Kósherbaev.
Aımaq basshysy jastarǵa «árbirińiz aldaryńyzǵa bıik maqsattar qoıyńyzdar, sonda ǵana uly jetistikterge jetesizder. Sizder de elimiz sııaqty zamanǵa saı qarqyndy damýlaryńyz qajet» dep atap ótti.
Ortalyq alańda toǵyzqumalaq, gir tasyn kóterý, strıtbol, arqan tartý, taekvondo, kórkem gımnastıka jáne t.b jarystar uıymdastyryldy.
Aıta ketý kerek, aımaqta sportty damytýǵa qajetti jaǵdaıdyń barlyǵy jasalǵan. Máselen,oblystaǵy barlyq sporttyq nysandardyń sany 2 120-ǵa jetti, onyń 1 418-i aýyldyq jerlerde ornalasqan. Tek sońǵy úsh jylda oblysta 9 sport kesheni paıdalanýǵa berildi.
Bıyl 7 eldi mekende sporttyq keshenderdiń qurylystary bastaldy. Memlekettik jekemenshik áriptestik aıasynda oblys ortalyǵynyń «Mereı» móltek aýdanynda dene shynyqtyrý-saýyqtyrý kesheni iske qosyldy. Sondaı-aq, Syrdarııanyń sol jaǵalaýynan 15 myń oryndyq stadıon salý josparlanǵan.
Sonymen qatar aımaq bıligi 2020 jylǵa qaraı sportpen turaqty shuǵyldanýshylardyń úlesin 30 paıyzǵa jetkizýdi mejelep otyr.
