Qyzylordalyqtar Iranǵa eksporttalatyn kúrish kólemin arttyrmaq
QYZYLORDA. QazAqparat - Bıylǵy jyly syrboıylyq sharýalar Iran eline eksporttalatyn kúrishtiń kólemin arttyrmaq. Ásirese, bul baǵyttaǵy jumysqa Qarmaqshy aýdanynyń kúrishshileri bilek sybana kiriskeli tur.
Aldaǵy maýsymda bul óńirde 800 gektar aýmaqqa kúrishtiń ırandyq «Tarom Hoshımı» sorty egilmek.
Jalpy, Qarmaqshy aýdanynda jergilikti halyq ala jazdaı kúrish egip, atyz basynda qona júrip eńbek etedi. Dıqandardyń eńbekteri esh ketip jatqan joq. Ótken jyly ár gektardan 59,5 tsentnerden ónim jınap, oblys boıynsha úzdik kórsetkishke qol jetkizdi.
«Aýdanymyzdaǵy «Aqtóbe ı K» jaýapkershiligi shekteýli seriktestigi táýligine 120 tonna kúrish aqtaıtyn tsehyn iske qosyp, óz ónimderin óńdeýdi bastady. Sonymen qatar, osy seriktestik ótken jyly 70 gektar jerge «Tarom Hoshımı» sortyn egip, jaqsy ónim jınady. Bul árıne, eń birinshi kezekte eksporttyq áleýetti arttyrý baǵytynda jasalǵan jumys bolatyn. Bıyl biz atalmysh sortty egetin aýmaqty 10 esege kóbeıtýdi josparlap otyrmyz. Óıtkeni, naryqta astyqtyń bul túrine suranys óte joǵary. Baǵasy da kóńilge qonymdy bolǵandyqtan, aýdanymyzdaǵy ózge de sharýa qojalyqtary osy kúrishti otyrǵyzýdy kózdep otyr», - dedi Qarmaqshy aýdanynyń ákimi Sultanbek Maqashov.
Aınur Tóleshova
