Qyzylordalyqtar Irakqa et satýdy josparlap otyr
QYZYLORDA. QazAqparat - Jaqynda Iraktyń saýda naryǵyndaǵy et ımporty jóninen kóshbasshy kompanııalardyń biri - «AlHasanat LTD» kompanııasynyń basshysy Qyzylorda oblysyna kelip, Kásipkerler palatasynyń alańynda aımaq kásipkerlerimen kezdesti. Bul týraly QazAqparat «Atameken» UKP-na silteme jasap habarlady.
Iraktyń iri qalalarynda ornalasqan syıymdylyǵy aıyna 7 myń tonnaǵa deıin jetetin muzdatqyshtary bar kompanııa ettiń basym bóligin AQSh, Ýkraına, Úndistan memleketterinen alady eken. Endi olar osy baǵytta Qazaqstanmen de yntymaqtastyqty arttyrýdy josparlap otyr.
Kompanııa basshysynyń Qyzylordaǵa kelýi úshin Kásipkerler palatasynyń mamandary uzaq ýaqyt kelissózder júrgizip, (vızasy daıyndaýyna jáne Ýkraınadaǵy ókildiktiń qyzmetkerleriniń kelýine kómek kórsetildi), nátıjesinde kompanııa basshysy maýsym aıynyń ekinshi onkúndiginde óńirge arnaıy keldi.
Bul týraly Kásipkerler palatasynyń bólim basshysy Jasulan Serikov: «Búginde Irakta 37 mln.-ǵa jýyq halyq turady. 2050 jylǵa qaraı bul kórsetkish 85 mln.-ǵa ósedi degen boljam bar. Sondyqtan da bul elde etke suranys asa joǵary. Máselen, qozy etiniń 1 kg-my bizdiń teńgege shaqqanda orta eseppen 4500-4800 teńgeni quraıdy. «Al Hasanat LTD» kompanııasynyń basshysy óńirge jumys saparymen kelgende qozylardy tirideı jáne muzdatylǵan qozy etin alǵysy keletindikterin jetkizdi. Kezdesý barysynda taraptar aldaǵy ýaqytta birge jumys jasaýǵa kelisip, Kásipkerler palatasy men «Al Hasanat LTD» kompanııasy arasynda Memorandýmǵa qol qoıyldy», - deıdi.
Kásipkerler palatasy alańynda ótken kezdesýden keıin ıraktyq kásipkerler Jańaqorǵan jáne Syrdarııa aýdandarynda bolyp, «Kóbeldes» ShQ, «Bahytjan» ShQ, «Yntymaq» JShS jáne «Abaı Dáýlet» sharýa qojalyqtarynyń jumysymen tanysty.
