Qyzylordalyqtar elordaǵa 380 tonna aýyl sharýashylyǵy ónimderin ákeldi
ASTANA. QazAqparat - 3-4 qyrkúıek kúnderi elordada Qyzylorda oblysy aýyl sharýashylyǵy ónimderiniń jármeńkesi ótedi.
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Qyzylorda oblystyq aýyl sharýashylyǵy basqarmasynyń bastyǵy Baqyt Jaqanov málim etti.
«Jármeńke Baýyrjan Momyshuly dańǵylyǵyndaǵy Oqýshylar saraıy mańyndaǵy kólik turaǵynda ótetindigi josparlanǵan. Qazir uıymdastyrý jumystary júrgizilip jatyr. Jármeńke 3-4 qyrkúıek kúnderi ótedi. Oǵan qatysý úshin oblysymyzdan 50 kásipker keldi, olar jalpy salmaǵy 380 tonnany quraıtyn aýyl sharýashylyǵy ónimderin 26 kólikpen ákeldi», - dedi B.Jaqanov.
Sonymen qatar ol elordalyqtar men qala qonaqtaryn jármeńkege shaqyrdy.
«Eń birinshi kezekte oblysymyzdyń atyn shyǵarǵan kúrishin molynan ákeldik. Munan bólek, et, qymyz, shubat jáne basqa da aýyl sharýashylyǵy ónimderin jetkizdik. Ónimderimizdiń baǵasy elorda bazarlarynan 15-20 paıyzǵa arzan bolady. Barlyqtaryńyzdy jármeńkede kútemiz», - dedi basqarma basshysy.
