Qyzylordalyqtar budan bylaı bastapqy tólemsiz turǵyn úı almaq
QYZYLORDA. QazAqparat - Qyzylorda oblysynda bastapqy tólemsiz turǵyn úı alýǵa múmkindik beretin «Orda» turǵyn úı qurylysynyń «Jol kartasy» ázirlendi. Bul týraly oblys ákimi Qyrymbek Kósherbaev halyqqa esep berý kezdesýinde málimdedi, dep habarlady QazAqparat tilshisi.
«Biz óńir turǵyndarynyń áleýmettik osal tobyn meılinshe qoljetimdi turǵyn úımen qamtamasyz etýdi maqsat etip qoıdyq. Sol úshin 2017 jyly 3 jylǵa eseptelgen «Orda» turǵyn úı qurylysynyń «jol kartasyn» ázirledik. Nesıelik turǵyn úıdiń kópbalaly otbasylar, múmkindigi shekteýli az qamtylǵan toptarynyń barlyǵyna birdeı qoljetimdi emestigin eskerip, «Nurly jer» baǵdarlamasy aıasynda salynyp jatqan nesıelik turǵyn úılerdi jergilikti bıýdjet esebinen satyp alýǵa jyl saıyn oblystyq bıýdjetten 2 mlrd.teńgeden qarjy bólý týraly sheshim qabyldadyq», - dedi aımaq basshysy.
Esterińizge sala keteıik, keıin óz atyna óteý quqyǵymen alǵashqy tólemsiz aı saıynǵy jalǵa alý quny shartymen turǵyn úıdi jergilikti atqarýshy organdardyń tizimindegiler, mysaly, kóp balaly jáne tolyq emes otbasylar, múmkindigi shekteýli balalary bar otbasylar, jetim balalar men ata-anasynyń qamqorlyǵynsyz qalǵan balalar, 1, 2 top múgedekteri, oralmandar jáne t.b. ala alady.
«Mysal úshin, osylaısha, endi, kópbalaly otbasy ekibólmeli páterdi aı saıyn 42 myń teńge, al, úshbólmeli páterdi 52 myń teńge tóleı otyryp, ala alady. Naqtylap aıtsaq, basqa baǵdarlamalarda qaralǵan 30%-dyq alǵashqy tólemsiz!Aıta ketý kerek, bizdiń bul tájirıbemiz basqa oblystarǵa da iske asyrýǵa usynylyp otyr», - dep atap ótti oblys ákimi.
