Qyzylordalyqtar bir apta boıy densaýlyqtaryn nyǵaıtpaq
QYZYLORDA.QazAqparat - «Densaýlyq» festıvali elimizde 20 jyldan beri atalyp ótilýde. Salaýatty ómir saltyn nasıhattaý sharasy bıyl 9 qyrkúıekke belgilendi. Al Qyzylorda oblysynda festıval aıasynda aptalyq uıymdastyrylady. Bul týraly Óńirlik kommýnıkatsııalar qyzmetinde ótken baspasóz máslıhatynda jastar densaýlyq ortalyǵynyń bas dárigeri Janar Qalmaqova málimdedi, dep habarlaıdy QazAqparat tilshisi.
Aptalyq aıasynda 4-9 qyrkúıek kúnderi emhanalarda «Ashyq esik» kúni ótedi. Sondaı-aq, festıval barysynda kópshilik túrli sporttyq saıystarǵa qatysa alady. Qazir oqý oryndary men mektepterde «Densaýlyq» sabaǵy ótýde.
«Bıyl alǵash ret múmkindigi shekteýli jandar da festıvalge qatystyryldy. Olardyń arasynda shyǵarmashylyq baıqaýlar ótkizilýde. 7 qyrkúıekte saıys jeńimpazdaryn anyqtaımyz», - dedi Janar Qalmaqova.
Aıta keteıik, 9 qyrkúıek kúni respýblıka boıynsha bir mezgilde «Densaýlyqqa 10 myń qadam» sharasy ótedi. Qyzylorda oblysynda marafonshylar «Dostyq úıi» aldynan Ortalyq alańǵa deıin júgiredi. Ortalyq alańda turǵyndarǵa arnap 3 shatyr ornalastyrylady. Onda densaýlyqqa paıdaly taǵamdar, jemis-jıdekter, dári-dármekter men paıdaly ónimderdiń jármeńkesi ótedi. Jastardyń zamanaýı bıleriniń kontserti bolady. Balalar úshin oıyn alańdary jumys jasaıdy.
«Nur Otan» partııasy oblystyq fılıaly tóraǵasynyń orynbasary Ádilbek Ersultanov: «Sport pen densaýlyqty bólip qaraýǵa bolmaıdy. Adamzat úshin ekeýiniń de qundylyǵy joǵary. Sondyqtan, oblys turǵyndaryn festıvalge qatysýǵa shaqyramyz», - dep atap ótti.
Festıval jeńimpazdaryna baǵaly syılyqtar tabys etiledi.
