Qyzylordalyqtar «Bastaý» arqyly bıznesterin bastaýda
QYZYLORDA. QazAqparat -Qyzylorda oblysynda «Bastaý-Bıznes» jobasy boıynsha bilim alǵan azamattardyń jobalaryn qarjylandyrý bastaldy, dep habarlady QazAqparat.
«Bastaý-Bıznes» jobasynyń eki leginiń qorytyndysymen «Aýyl sharýashylyǵyn qarjylaı qoldaý qory» AQ Qyzylorda oblystyq fılıaly arqyly 8 qatysýshynyń jobasy qarjylandyryldy.
Atap ótken jón, Nátıjeli jumyspen qamtý jáne jappaı kásipkerlikti damytý baǵdarlamasy aıasynda Qyzylorda oblysynyń kásipkerler palatasy aýyldyń 367 azamatyn «Bastaý-Bıznes» jobasy aıasynda oqytyp shyqty. Joba kásipkerlik negizderine oqytýǵa, kásipkerlik bastamalardy qoldaýǵa baǵyttalǵan. Onyń qatysýshylary aýyldyq jerlerde bıznespen aınalysýǵa áleýeti bar, ózin-ózi jumyspen qamtyǵan azamattar men jumyssyzdar.
Qazirgi tańda «Bastaý-Bıznes» jobasy sheńberinde pılottyq negizde Aral, Qazaly, Qarmaqshy, Shıeli, Jańaqorǵan aýdandarynyń turǵyndary oqytylýda. Jyl sońyna deıin alty kezeńmen 937 adamdy oqytý josparlanǵan. Búgingi kúnge deıin onyń eki kezeńi aıaqtalyp, 367 qyzylordalyq bıznesterin bastaýǵa daıyn. Úshinshi kezeńge 168 azamat ótinim berip, onyń 157-si testileýden sátti ótti», - deıdi Kásipkerler palatasynyń dırektory Ǵalymbek Jaqsylyqov.
Oqý protsesi barysynda qatysýshylar bıznes-trenermen birge bıznes-josparlaryn ázirlep, ony Palata janyndaǵy oblystyq komıssııa aldynda qorǵap shyǵady. Komıssııa quramyna «Aýyl sharýashylyǵyn qarjylaı qoldaý qory» AQ, «QazAgroGarant» AQ, «Qyzylorda» Óńirlik ınvestıtsııalyq ortalyǵy Mıkro qarjylyq uıymy» JShS ókilderi men jergilikti atqarýshy organ ókilderi engen. Jobasyn sátti qorǵap shyqqan azamattardy Kásipkerler palatasy joǵaryda atalǵan qarjy uıymdaryna qarjylandyrý úshin usynady.
