Qyzylordalyqtar aýyl sharýashylyǵy ónimderiniń eksportyn ulǵaıtpaqshy
QYZYLORDA. QazAqparat - Iran Islam Respýblıkasynyń ókilderi qyzylordalyq kúrishke qyzyǵýshylyq tanytýda. Osyǵan qaraı Syr óńiriniń sharýalary bolashaqta kúrish egisiniń alqabyn keńeıtip, Iranǵa osy ónim túrin mol kólemde eksporttaýdy josparlap otyr. Bul týraly oblystyq aýyl sharýashylyǵy basqarmasynyń basshysy Baqyt Jahanov aıtty, - dep habarlady QazAqparat.
Onyń málimetterine qaraǵanda, Qyzylorda oblysy boıynsha 214 aýyl sharýashylyǵy kooperatıvi qurylǵan. Jeke jáne qosalqy sharýashylyqtardyń birigýimen 19 aýyl sharýashylyǵy kooperatıvin qurý josparda tur. Qurylǵan kooperatıvterdi qarjylandyrý «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» aıasynda bıylǵy jyly bólingen 1 765 mln teńge qarjy esebinen júzege asyrylady.
Qazirdiń ózinde «Aýyl sharýashylyǵyn qarjylaı qoldaý qory» AQ Qyzylorda fılıaly arqyly 15 kooperatıv 933,5 mln. teńgege 5649 bas múıizdi iri qara malyn alýǵa qol jetkizdi. Sondaı-aq, kúrish jarmasyn suranysy joǵary, qymbat naryqtarǵa shyǵarý maqsatynda «Aqtóbe ı K» JShS-gi arqyly Iranda «Torem Hoshemı» sortyn bıyl 100 gektarǵa egip, 60 tonna aq kúrishti eksporttaý, 2020 jylǵa qaraı kúrish egisiniń kólemin 5 myń gektarǵa ulǵaıtyp, Iran Islam Respýblıkasyna 8 myń tonna kúrish ótkizý josparlanýda.
Iran Islam Respýblıkasy Syr óńirinde ósiriletin kúrishtiń «Novator» sortyna qyzyǵýshylyq tanytyp, «Syr Marjany» JShS arqyly kúrishti eksporttaý máselesine baılanysty jumystar da qatar júrgizilýde. Sonymen qatar, oblysta baqsha daqylyn óndiris negizinde egý kólemin ulǵaıtý arqyly, Reseıde suranysy joǵary qaýyn sorttaryn egip, syr qaýynyn eksporttaý sharalary jalǵasýda.
