Qyzylordalyqtar Arysqa gýmanıtarlyq kómek jiberdi
Azyq-túlik jáne basqa da qajetti zattarmen avtokólikter Arys qalasyna jolǵa shyqty. Túrkistan oblysy Arys qalasynyń áskerı bólimindegi tótenshe jaǵdaıǵa baılanysty qyzylordalyqtar qol ushyn sozdy.
Qyzylorda turǵyndary Qyzylorda oblysynan 15 tonna kúrish, 10 tonna un, 5 tonna qaraqumyq jáne 1,5 tonna sút Arys turǵyndaryna jiberdi. Bul ónimderdi oblystaǵy «Abzal ı K» tolyq seriktestigi, Aqtóbe jáne K», «Abaı Dáýlet», «Jan Araı», «Jańajol», «Syr marjany» jáne «Túgisken TSh» jaýapkershiligi shekteýli seriktestikteri, «Aqjarma 2», «Aqmaıa», «Tóńkeris K» sharýa qojalyqtary sekildi aýylsharýashylyq taýar óndirýshileri qamtamasyz etti.
«Bul - qyzylordalyqtardyń Arystaǵy aǵaıyndary úshin bir tún ishinde jınaǵan gýmanıtarlyq kómegi. Ol áli jalǵasýda, oblys ákimi janynan jedel shtab quryldy. Shtab zardap shekken turǵyndarǵa gýmanıtarlyq kómek kórsetýdi uıymdastyrýmen aınalysady. Sonymen qatar, «Nur Otan» partııasynyń oblystyq fılıalynda Arys turǵyndaryna kómek qabyldaý pýnkti ashyldy. Aldaǵy kúnderi taǵy da osyndaı kómek túrlerin uıymdastyrýdy josparlap otyrmyz. Meniń oıymsha, bul zardap shekkenderdi qoldaý úshin jınalǵan qazaq halqynyń birliginiń dáleli», - dedi «Nur Otan» partııasy oblystyq fılıaly tóraǵasynyń orynbasary Erjan Baıtiles.
Sondaı-aq, Syr óńirinde jergilikti atqarýshy organdardyń 2000-nan astam memlekettik qyzmetshisi jarylystan zardap shekkenderge bir kúndik jalaqysyn aýdarmaq.
Budan buryn Qyzylordada Arystaǵy tótenshe oqıǵaǵa baılanysty Qyzylorda oblysy temirjol stantsııalarynda kidirgen jolaýshylarǵa túrli kómekter kórsetilgenin habarlaǵan edik.
