Qyzylordalyq jolaýshylar Máskeýge ushaqpen tikeleı qatynaıdy

QYZYLORDA. QazAqparat - 16 shildeden bastap Qyzylordadan Reseı astanasy - Máskeý qalasyna qatynaıtyn jańa áýe baǵyty óz jumysyn bastaıdy. Ushaqtar aptasyna 4 ret - dúısenbi, sársenbi, juma, senbi kúnderi ushady, dep habarlaıdy QazAqparat tilshisi oblys ákimdigine silteme jasap. 

Áýe tasymaly «Aeroflot» kompanııasynyń A-320/321 «Eırbas», «Boeing-737» ushaǵymen júrgiziledi. Sonymen qatar,  «Baıqońyr-Qyzylorda (áýejaı)»  transferi daıyndalady.

«Bıylǵy jyldyń mamyr aıynda «Qorqyt ata» áýejaıynyń qyzmetkerleri «Avıatsııalyq aeroflot mektebiniń» mamandarynan arnaıy oqýdan ótip, A320/321 áýe kemesiniń tehnıkalyq qyzmet kórsetý daıarlyǵyn tekserýden ótkizdi. Qyzylorda oblysy jolaýshylar kóligi jáne avtomobıl joldary basqarmasy Baıqońyr qalasynyń ákimshiligimen áýe baǵytynyń jumysyn jandandyrý maqsatynda áýejaıǵa baratyn avtobýstar máselesi týraly jumystardy atqardy. «Aeroflot» kompanııasy arqyly ushý basqa áýe kompanııalarymen salystyrǵanda birshama arzan», - dedi oblys ákiminiń orynbasary Serik Súleımenov.

Aıta keteıik, búginde alǵashqy reıs bıletteriniń basym bóligi satylyp ketken.