Qyzylordalyq jeńil atletter álem chempıonatyna barady
QYZYLORDA. QazAqparat - Qyzylordalyq 6 sportshy múmkindigi shekteýli azamattar arasyndaǵy álem chempıonatynda baq synaıtyn boldy, dep habarlaıdy QazAqparat tilshisi.
Syr sańlaqtary bul múmkindikke Birikken Arab Ámirliginiń Shardja qalasynda ótken múmkindigi shekteýli sportshylar arasynda jeńil atletıkadan lıtsenzııalyq halyqaralyq týrnır barysynda qol jetkizdi. Álem chempıonaty bıyl qarasha aıynda Birikken Arab Ámirliginiń Dýbaı qalasynda ótedi dep josparlanyp otyr.
Jeńil atletıkadan lıtsenzııalyq halyqaralyq týrnırde Qolǵanat Baqbergen uzyndyqqa sekirýden, Islam Sálimov 100 jáne 200 metrlik qashyqtyqqa júgirýden, Elaman Jolaman naıza laqtyrýdan kúmis júlde aldy. Sondaı-aq, Baǵdat Elibaev 800 metrlik qashyqtyqqa júgirýde máre syzyǵyn ekinshi bolyp qıyp, jarys barysynda rekord jańartty. Ol 400 metrlik qashyqtyqqa júgirýde qola júldeger atandy.
Qyzylordalyq sportshylar 22-27 aqpanda atalmysh memlekettiń Dýbaı qalasynda bolatyn taǵy bir týrnırde baq synaıdy.
