Qyzylordalyq jas ánshi halyqaralyq baıqaýdyń bas júldesin jeńip aldy
QYZYLORDA. QazAqparat-Qyzylordalyq jas talant Áıgerim Ómirbek halyqaralyq «Jańa juldyz» konkýrsynyń «Gran-prı» júldesin jeńip aldy,-dep habarlady QazAqparat HAA tilshisi oblystyq mádenıet basqarmasyna silteme jasap.
Astana qalasynda «EKSPO - 2017» kórmesi qarsańynda «Qazaqstan talanttary» shyǵarmashylyq qozǵalysynyń uıymdastyrýymen ІІ halyqaralyq «Jańa juldyz» konkýrs-festıvali ótti.
Baıqaýǵa barlyǵy 5-40 jas aralyǵyndaǵy 1500 úmitker qatysty. Olar ónerdiń barlyq janr túrinen ıaǵnı án-bı, aspaptar, estrada-vokal, halyqtyq shyǵarmalary boıynsha synǵa tústi.
Konkýrsqa Qyzylorda oblysynan qatysqan Asqar Toqmaǵambetov atyndaǵy mádenıet úıiniń janynan qurylǵan qala ákiminiń «Mereke» aspaptyq ansambliniń ánshisi, birneshe baıqaýlardyń jeńimpazy Áıgerim Ómirbek baıqaýdyń estrada-vokal nomınatsııasy men «Gran-prı» júldesin jeńip aldy.
«Buǵan deıin de birneshe konkýrstarda baǵymdy synap júrdim. Degenmen bul baıqaýdan alǵan áserim erekshe. Qarsylastarym da osal bolmady. Árbir qatysýshy óz eliniń, óńirleriniń talantty ónerpazdary. Baıqaý joǵary deńgeıde uıymdastyrylǵan jáne óte ádil ótti dep oılaımyn», - deıdi baıqaýdan keıingi óz áserimen bólisken Áıgerim.
