Qyzylordalyq jas ánshi Belarýste ótken konkýrstyń Gran-prı júldesin jeńip aldy

QYZYLORDA. QazAqparat - Qyzylordalyq jas ónerpaz Dinmuhammed Tóleýbaı jaqynda Belarýste ótken «Art-parad» konkýrsynyń Gran-prı ıegeri atandy. QazAqparat tilshisiniń jas ónerpazben kezdesip, suhbattasýdyń sáti tústi.

Elimizdiń abyroıyn asqaq etken óren búginde Qyzylorda qalasyna qarasty Tasbóget kentindegi №11 orta mektepte jetinshi synypta oqıdy. Anasy Lıda Bısenova Dinmuhamed balabaqshada júrgen kezinen án aıtýǵa áýes bolǵanyn jetkizdi. Tórt jasynda alǵashqy ánin kópshilik aldynda aıtqan. Mektep tabaldyryǵyn attaǵannan keıin oǵan shyndap den qoıdy. «Boztorǵaı» baıqaýyna qatysqan bolatyn.

Keıin talantty ónerpazdy kóptegen qyzylordalyq ónerpazdardy tárbıelep shyǵarǵan belgili ustaz Qarakóz Aqdáýletova baıqaǵan.

«Dinmuhammedtiń úlken atasy - Tóleýbaı kezinde aqyndyǵymen kózge túsken eken. Kóptegen shyǵarmalary merzimdik basylymdarda jarııalanǵan. Aıtysta da óz qoltańbasyn qaldyrǵan. Atadan juǵysty bolǵan sol ónerdiń kıesi bizdiń Dinmuhammedke qonǵan shyǵar deımiz. Ákesi - Aǵabek pen anasy - men ekeýimiz de ónerden qashyqpyz. Ákesi energetıka salasynda qyzmet atqarsa, men №11 orta mektepte ustaz bolyp eńbek etemin», - dedi anasy Lıda.

Ekinshi synyp oqyǵan jyly ony elimizge belgili mýzyka mamany Qarakóz Aqdáýletova óziniń synybyna qabyldady. Mýzykalyq kolledj janyndaǵy mýzykalyq mektepte talaı talantty órender tálim alady. Dinmuhammed te solar sekildi óreli óner álemine bet túzegen órender qataryna qosyldy.

«Men onyń deńgeıin oblystyq «Boztorǵaı» baıqaýynda ańǵardym. Sodan keıin Dinmuhammed ekeýimiz jumys jasaı bastadyq. Ras, alǵashqyda qıyndyqtar az bolǵan joq. Onyń bárin jeńdik. Qazir ol joǵary daýysty erkin alatyn bolǵandyqtan onyń repertýarynda ıtalıandyq ánder de bar. Shynyn aıtaıyq, mundaı shyǵarmalardy kez-kelgen ónerpaz oryndaı almaıdy. Belarýs jerinde ótken «Art-parad» konkýrsyna daıyndyqqa biraz ýaqytymyzdy jumsadyq. Eńbegimiz eselenip qaıtty. Fılarmonııanyń kameralyq orkestriniń súıemeldeýimen de oryndap kórdik. Jalpy, ıtalıan tili óte kúrdeli. Sondyqtan halyqaralyq baıqaýdan abyroıly oralý úshin jasaǵan jumysymyz az emes. Aldaǵy ýaqytta «Novaıa volna» konkýrsyna qatysý joldaryn qarastyryp jatyrmyz. Shákirtimniń sheberligi aldaǵy ýaqytta odan da joǵary deńgeıde shyńdala túsedi degen senimdemin», - deıdi Qarakóz Aqdáýletova.

Sońǵy jyldary qazaqstandyq kóptegen ánshiler dúnıejúziniń dúbirli básekelerinde qazaq eliniń ataǵyn aspandatyp, mártebesin bıiktetip keledi. Búginde el arasynda esimi keńge jaıylǵan Dımash Qudaıbergenov, Erjan Maksım, Danelııa Tóleshova syndy jas býyn ókilderi jumyr jerdegi jurttyń jadynda jattalyp qaldy. Qazaq halqynyń án álemindegi óz órnegin aıshyqtap úlgerdi. Syrdarııanyń sybdyr qaqqan ásem áýeni besiginde áldılep ósirgen Dinmuhammed te sondaı bıikten kórinýdi qalaıdy.

«Art-parad» konkýrsynda sahnaǵa shyqqan sátimde qobaljý bolǵanyn jasyra almaımyn. Barlyǵy maǵan syn kózben qarady. Ónerdegi ustazym - Qaragóz apaı ánimdi oryndaýǵa shyǵar aldynda maǵan kúsh-jiger beredi. Sahnada qobaljýym sap tıyldy, ánimdi óz deńgeıinde oryndap shyǵýǵa kóńil bóldim. Qazylar alqasy ónerimdi joǵary baǵalady. Olardyń aldynda ánimdi jaqsy shyrqadym. Olar qoshemet bildirip, qol soqty. Bul maǵan erekshe kúsh berdi. Óte keremet áserge bólendim. Onda 18-30 jas aralyǵyndaǵy daryndy jastarmen saıysqa tústim», – deıdi Dinmuhammed.

Jas ánshi gran-prı jeńip alǵan sátindegi áserin erekshe bolǵanyn jetkizdi

«Baıqaýda gran-prı jeńip alǵan sáttegi áserimdi sózben jetkizý múmkin emes. Óner báıgesinde kóptegen dostarmen tanystym. Esimi belgili azamattarmen sóılesýge, aqyl-keńesin tyńdaýǵa múmkindik týdy. Olardyń qatarynda tenor daýysty ánshi, «Slavıanskıı bazar» konkýrsynda jeńimpaz atanǵan Ádilhan Makınmen júzdesýdiń sáti tústi. Odan ózge de úlgi tutar kóptegen aǵalarmen tanystym. Reseıdiń belgili barıton ánshisi Pavel Kýzmın de maǵan óz keńesin berdi. Sondaı-aq, Belarýs ánshisi Rýslan Alehno da óner álemindegi qadamyma aq jol tiledi. Armanym Qazaqstannyń atyn álemge tanytý», – deıdi ol.