Qyzylordalyq zaǵıp qyz án aıtyp, óleń jazýmen shuǵyldanady
QYZYLORDA. QazAqparat - Qyzylordalyq ánshi jáne aqyn Ásel Tórebaeva taǵdyrdyń jazýymen bes jasynda kózi kórýden qalǵan. Qaısar minezimen alǵa umtylǵan jas óziniń óneri jáne óleńi arqyly qyzylordalyqtarǵa keńinen tanymal bolyp úlgerdi, dep habarlaıdy QazAqparat tilshisi.
Ol Syrdarııa aýdany Aqjarma aýylynda turady. Qazirgi tańda Qyzylorda oblystyq fılarmonııasynda ánshi qyzmetin atqarady. Qashanda izdenis jasaýdan jalyqpaıtyn ánshi qyz árbir áni arqyly óner ólkesinde óz órnegin salyp keledi. Áseldiń bes jasynda kóz janary nasharlaı túsken. Ata-anasy jelkildep ósken jetkinshekti dárigerlerge emdeýge alyp barady. Alaıda olardan keler qaıran bolǵan joq. Aq jeleńdi mamandyq ıeleri Áseldiń kóz janarynyń qaıta túzelýine barynsha kúsh saldy. Ota jasaldy. Dese de odan keıin jas óren jaryq dúnıeni kórý baqyty buıyrǵan joq.
Sodan bergi jyldarda janyna ándi serik etti. Áýeleı shyrqalǵan árbir án janyna qýat syılap, ózine erekshe jiger qosady. Osylaısha ózine shabyt alady. Ónerin baǵalaǵan jerlesteri árdaıym oǵan qoldaý kórsetip keledi. Sondaı-aq, Ásel óleń jazýmen de aınalysady. Júrek túkpirinde jatqan jyr joldaryn óleńmen óre túsedi. Óziniń oryndaýyndaǵy keıbir ánderin ózi daıyndaıdy.
Qyzylorda men Aqjarma aýylynyń arasy 70-80 shaqyrymdy quraıdy. Soǵan qaramastan oblystyq fılarmonııada qyzmet etip júrgen Áseldiń óner ujymynyń basshylyǵyna aıtatyn alǵysy zor.
«Maǵan fılarmonııa basshylyǵy qoldaý kórsetip keledi. Oǵan shyn júrekten rızashylyǵymdy bildirgim keledi. Jumysqa kúnde kelýdi talap ete bermeıdi. Negizinen kontsert jáne ózge de kóptegen mádenı is-sharalarda kelýge tyrysamyn. Bul meniń júrek qalaýymmen tańdap alǵan kásibim ǵoı. Ánshilik óner - meniń janyma jaqyn. Óner ordasy - meniń ortam. Ánshilik óner maǵan erekshe unaıdy», - dedi Ásel Tórebaeva.
Byltyr Ásel oblystyq fılarmonııada «Ánshi baǵy» atty jeke shyǵarmashylyq keshin ótkizdi. Atalmysh sharany Qyzylorda qalasynyń 200 jyldyq mereıtoıyna arnady. Sol shyǵarmashylyq keshinde «Qyzylordam» atty ániniń tusaýkeserin jasady. Ony áriptesterimen birge oryndap shyqty.
Búgingi kúnge deıin óner ıesi óziniń án jınaǵyn da shyǵaryp úlgerdi. «Kóńilimniń nury» atty án jınaǵy tyńdarman qaýymnan joǵary baǵasyn aldy.
Ásel aldaǵy ýaqytta bilikti dárigerler qaraýyna baryp, óziniń densaýlyq jaǵdaıyn jaqsartýdy armandaıdy. Ánshi qyzdyń ónerge degen qushtarlyǵy ózine shabyt beretinin jasyrmaıdy. Árbir qıyndyqqa qarsy turýǵa osyndaı jigerliligi mol septigin tıgizip keledi.
