Qyzylordalyq úzdik dıqandar Ybyraı Jaqaev medalimen marapattaldy
QYZYLORDA. QazAqparat - Qyzylordada aq kúrishtiń atasy atanǵan, Sotsıalıstik Eńbek Eri Ybyraı Jaqaevtyń 125 jyldyǵyna arnalǵan keń kólemdegi merekelik is-sharalar bastaldy.
Asqar Toqmaǵambetov atyndaǵy mádenıet úıinde «Dala akademıgi - Ybyraı» taqyrybynda ǵylymı-tájirıbelik konferentsııa ótti. Oǵan QR Aýyl sharýashylyǵy mınıstrliginiń jaýapty hatshysy Ermek Kósherbaev, Ybyraı Jaqaevtyń uly, eńbek ardageri Seıitbek Jaqaev, aýyl sharýashylyǵy salasynyń mamandary, memlekettik qurylymdar men ÚEU ókilderi qatysty, dep habarlaıdy QazAqparat tilshisi.
Konferentsııa jumysy aımaq basshysy Qyrymbek Kósherbaevtyń alǵysózimen bastaldy. Ol Ybyraı Jaqaev ár gektardan 171 tsentnerden kúrish ónimin jınap, álemdik rekordqa qol jetkizigenin jáne sol úshin «dala akademıgi» atanǵanyn tilge tıek etti.
«Qyzylorda oblysy árkez eńbek adamdarymen tanylǵan aımaq. Oblys boıynsha 102 adam Sotsıalıstik Eńbek Eri ataǵyn alǵan. Onyń 41-i Shıeli aýdanynan shyqqan. Jaqaevtyń sara jolyn onyń shákirtteri men izbasarlary jalǵastyryp keledi. Qyzylordanyń kúrishin tek Qazaqstan ǵana emes, Reseı, Qyrǵyzstan jáne Tájikstan memleketteri tutynady. Osy jyldan bastap Ybyraı Jaqaev medalimen aımaqtyń eń úzdik dıqandary marapattalatyn bolady», - dedi oblys ákimi Qyrymbek Kósherbaev.
Ybyraı Jaqaev atyndaǵy medal aldymen onyń shákirtteri, Sotsıalıstik Eńbek Erleri Sálıma Jumabekova, Shyrynkúl Qazanbaeva jáne Amangeldi Ahmetovke sondaı-aq, bıylǵy naýqanda úzdik kórsetkishke qol jetkizgenderge tabystaldy.
Konferentsııada Eńbek Eri, QR Parlamenti májilisiniń depýtaty, kúrish óndirýshiler men óńdeýshiler óńirlik qaýymdastyǵynyń prezıdenti Abzal Eralıev, «Qazaq ósimdik sharýashylyǵy ǵylymı-zertteý ınstıtýty» JShS-niń bólim basshysy Ǵalıolla Meıirman, «A.Ospanov atyndaǵy topyraqtaný jáne agrohımııa ǵylymı-zertteý ınstıtýty» JShS-niń bas dırektory Abdýlla Saparov, «Ybyraı Jaqaev atyndaǵy kúrish sharýashylyǵy ǵylymı-zertteý ınstıtýty» JShS-niń bas dırektory Serikbaı Ómirzaqov jáne ózge de ǵalymdar men aýyl sharýashylyǵy mamandary Qazaqstandaǵy kúrish ósirý máseleleri jáne onyń bolashaǵy taqyrybynda baıandama jasady.
Osy kúni qyzylordalyqtar Eńbek alleıasynda Ybyraı Jaqaev eskertkishiniń aldyna gúl shoqtaryn qoıdy. Al, 22 qazanda «dala akademıginiń» mereıtoıy ózi týǵan jeri Shıeli aýdanynda jalǵasady. Onda kúrish tarıhynyń murajaıy jáne Qurmetti azamattar alleıasy ashylady. Sondaı-aq, aýdannyń aýylsharýashylyq salasyndaǵy úzdik mamandardy marapattaý jáne merekelik serýendeý sharalary ótedi. Jeksenbi, 23 qazanda qalalyq ıppodromda at jarysy bolady.
