Qyzylordalyq ustaz shákirtterine aǵash buıymdaryn jasaýdyń qyr-syryn úıretýde
QYZYLORDA. QazAqparat - Qyzylorda oblysy Aral aýdanyna qarasty Jaqsyqylysh kentinde turatyn Álnur Jarqynbaev balalarǵa arnalǵan aǵash oıynshyqtar jasaýmen aınalysady, dep habarlaıdy QazAqparat tilshisi.
Álnur Jarqynbaev Jaqsyqylysh kentindegi №19 orta mektepte sabaq beredi. Ol mektepte qolóner úıirmesin ashýǵa uıytqy boldy. Qazir úıirmege qatysyp júrgen órender qatary kóp. Olar aǵash buıymdaryn jasaýdyń qyr-syryna qanyǵyp keledi. Qolóner sheberi óz shákirtterimen birge kóptegen dúnıelerdi jasap shyqty. Atalmysh buıymdar oblystyq jáne aýdandyq kórmelerge qoıyldy. Sol oryndarda halyqtyń joǵary baǵasyn alyp úlgerdi.
«Rasynda, bul óner kenje qalyp keledi. Oǵan shydamdylyq pen tózimdilik qajet. Sondyqtan oǵan kóbimiz nazar aýdara bermeıtin boldyq», - dedi Álnur Jarqynbaev.
Úıirmede jasalǵan dúnıeler kórmelerde óz tutynýshysyn taýyp jatady. Satylǵan dúnıeler aqshasyna mektepke qajetti jabdyqtar alady. Jas órender atadan amanatqa aınalǵan qolónerdiń qyr-syryn qanyǵýǵa tyrysyp júr.
«Qazaqta «Shydamy jetken sheber bolar» degen ǵıbratty sóz aıtylǵan. Kóne kezeńnen beri bizdiń babalarymyz san alýan buıymdardy qolmen jasaı bildi. Ol búgingi kúnge jetip, jas urpaqtyń boıynda jarqyrap keledi. Men ózim úırengendi balalardyń zerdesine toqýǵa tyrysyp kelemin. Solardyń biri - aǵashtan jasalǵan oıynshyqtar», - dedi qolóner sheberi. 
Sheberdiń qolynan shyqqan dúnıeler kózdiń jaýyn alady. Ol balalarǵa zııansyz dúnıeler jasap júrgenin ıgilikti is retinde baǵalaıdy. Sondaı-aq, ol árbir dúnıesin qyzǵylyqty etip jasap shyǵýǵa nazar aýdarady.
«Qazir bazarǵa barsań san alýan oıynshyqtardan kóz súrinedi. Degenmen olardyń basym bóligi derlik bala densaýlyǵyna zııandy zattardan jasalǵan. Bul jaıynda qazir ashyq aıtylyp ta, jazylyp ta júr. Men sapaly dúnıe jasaýǵa kóńil bóldim. Qazir balalardy qyzyqsyz zattarǵa tarta almaısyń. Sondyqtan men árbir jasaǵan oıynshyqtyń dızaınyna nazar aýdaramyn. Onyń qyzyqty bolýyna erekshe kóńil bólemin», - dedi Á. Jarqynbaev.
Qolóner sheberi aǵashtan ertegi keıipkerleri, ushaq, jan-janýarlar áne ózge de dúnıeler jasaıdy. Qazir mundaı dúnıelerdi tek kórmelerde el nazaryna usynyp keledi. Keleshekte ony odan ári jetildirip, óz isin keńeıtýdi kózdep otyr. Sondaı-aq, túrli dybys shyǵaratyn, jaryq beretin fýnktsııalardy qosýǵa nıet tanytyp júr.
Sondaı-aq, qolóner sheberi qazaqtyń ózge de buıymdaryn jasaýmen aınalysady. Olardyń qatarynda dombyra, aǵash tabaqtar jáne ózge de baǵaly dúnıeler bar.
Budan buryn Qyzylorda oblysynda kilem toqyp sal aýrýynan jazylǵandar bar ekenin habarlaǵan edik.
