Qyzylordalyq turǵyndardy 4 mln teńge shyǵynǵa ushyratqan ákki ury ustaldy
QYZYLORDA. QazAqparat - Qyzylordalyq polıtsııa qyzmetkerleri 4 mıllıonnan asa teńgeniń baǵaly buıymdaryn urlaǵan ákki uryny qolǵa túsirdi, dep habarlady QazAqparat oblystyq ІІD-ge silteme jasap.
2017 jylǵy 24 tamyzda kúndizgi 09:00-18:00 shamasynda belgisiz bireý Qyzylorda qalasy turǵynynyń úıine plastık terezesin ashyp kirip, jatyn bólmesindegi altyn buıymdaryn urlap ketkeni belgili boldy. Nátıjesinde qala turǵynyna 2 mln. 654 myń teńge materıaldyq zalal keltirilgen. Jedel-izdestirý sharalary kezinde Qyzylorda qalasynyń 33 jastaǵy turǵyny anyqtalyp, ýaqytsha ustaý ızolıatoryna qamaqqa alyndy.
Tergeý jumystary barysynda ustalǵan azamattyń taǵy 2 urlyq qylmysyna qatystylyǵy anyqtaldy. Eki jaǵdaıda da úıjaıǵa plastık terezesin kúshpen ashý arqyly kirgen. Birinde altyn buıymdardy urlap, 153 myń teńge shyǵyn keltirilse, endi birinde altyn, brıllıant áshekeı buıymdarymen qatar «Iphone 5» markaly uıaly telefonnyń 2 danasyn urlap, 1 mln. 630 myń teńge kóleminde shyǵyn keltirgen.
Atalǵan derek sotqa deıingi tergep-tekserýdiń biryńǵaı tizilimine Qazaqstan Respýblıkasy Qylmystyq kodeksiniń 188-baby 3-bóligimen (Іri mólsherde jasalǵan urlyq) tirkeldi. Atalǵan azamattyń basqa da qylmystarǵa qatystylyǵyn anyqtaý maqsatynda tergeý amaldary júrgizilýde.
