Qyzylordalyq sýretshi qysta jalańaıaq júrý arqyly aýrýynan jazyldy
QYZYLORDA. QazAqparat - Qyzylorda oblysy Aral aýdanyna qarasty Qaraqum aýylynda turatyn sýretshi Abaı Ábishev qys mezgilinde jalańaıaq júretindigimen jerlesterin tańǵaldyryp keledi. Oǵan qosa jeleń kıinip, sergek júrgendi qalaıdy, dep habarlaıdy QazAqparat tilshisi.
Qylqalam sheberiniń mundaı ómir súrý daǵdysyna kóńil bólgenine jıyrma jyldaı ýaqyt bolǵan. Alǵashqyda tamaǵy aýyryp, ábden mazasy ketken ol kúnderdiń kúninde jalańaıaq júrýge sheshim qabyldaıdy. Tipti, sonyń saldarynan tósek tartyp jatyp qalǵan ýaqyty da bolǵan. Qys mezgilinde qarda jalańaıaq júrgeninen bastap sol aýrýynan qulan-taza jazylyp ketti. Tymaýdyń ózi tımeıdi eken.
«Meniń tamaǵym bozbalam kúnimnen aýyratyn. Tipti, sý ishkendeı shólim qanbaıtyn kúıge tústim. Ras, oǵan mán bermeı júrgenmin. Beride ol meni kóbirek mazalaı bastady. Odan qutylýdyń jolyn qarastyra bastadym. Jastaıymnan kitap oqyǵandy janym qalaıdy. Sondaı kúnderdiń birinde kitaptan tómendegi derekke kózim tústi. Onda «Adam sýyqqa shydasa, kóptegen aýrýdan aıyǵady» degen sóz bar eken. Oılanyp qaldym. Sodan keıin jalańaıaq júrýge kóńil bólip kelemin. Sodan beri jıyrma jyldan asty. Men de ózimdi mazalaǵan aýrýymnan qutyldym. Árıne, gıgıena turǵysynan durys emes shyǵar Únemi jalańaıaq júrgen durys emes», - dedi Abaı Ábishev.
Sýretshi Abaı Ábishev aýyldan jyraq ketken emes. Bir jyldary oblys ortalyǵyna baryp, biraz ýaqyt jumys jasap keldi. Degenmen, týǵan topyraqqa qaıta oraldy.
Qazir aýylda óz shyǵarmashylyǵyn damytýǵa kóńil bólip keledi. Sýretshiniń qylqalamynan týǵan «Aqsaq kıik», «Ǵarysh ǵalamaty», «Tankıster», «Jekpe-jek» sekildi shyǵarmalar kópshilik tarapynan joǵary baǵasyn aldy. Onyń árbiri óz aıshyǵymen, óz naqyshymen erekshelenedi. Qylqalam sheberi sýyq aýa raıyna shydamdy. Jyly mezgilge asa shydaı bermeıdi. Jazda kóleńke jer izdeıdi eken.
