Qyzylordalyq stýdent kompıýterlik vırýsqa qarsy joba oılap tapty

QYZYLORDA. QazAqparat - Qyzylordalyq stýdent Dastan Aıtbaı vırýsqa qarsy qorǵanys retinde qoldanylatyn arnaıy jobany oılap tapty. Bul joba oblys ákimdiginiń qoldaýymen aqparattyq tehnologııany damytý maqsatynda ashylǵan ІT-parkinde kópshilikke keńinen tanystyryldy, dep habarlaıdy QazAqparat tilshisi.

Qazirgi tańda ınternette vırýs taratatyn siltemeler kóp. Olarǵa qarsy antıvırýstar jasalady. Dese de kóp uzamaı ony joıyp jibere alatyn ózgeshe vırýstar paıda bolyp jatady. Dastan ózi jasaǵan júıesi vırýsqa myqty tosqaýyl bolatynyna senimdi. Bul hakerlerdiń jemtigine aınala qoımaıtyn joba retinde baǵalanyp otyr.

«Men buǵan «Kafka» baǵdarlamasy degen ataý berdim. Ony vırýsqa qarsy vırýs deýge negiz bar. Joba boıynsha ol vırýsty óz qaqpanyna túsiredi. Oǵan óziniń vırýstaryn júktep jibere alady. Nátıjesinde jiberilgen vırýs qaıtadan burynǵy «uıasyna» baryp, arqalap kelgen júgi arqyly ózin-ózi joıyp jiberedi», - dedi Dastan Aıtbaı.

Dastan Aıtbaı qazir Qorqyt ata atyndaǵy Qyzylorda memlekettik ýnıversıtetinde tálim alady. Ol bul eńbegimen respýblıkalyq baıqaýlarǵa qatysyp, júldeli oralyp qaıtty. Ol atalmysh jobanyń keleshekte óz jemisin beretinine zor senimmen qaraıdy.