Qyzylordalyq sportshy búkilálemdik oıyndarda júldeger atandy

QYZYLORDA. QazAqparat - Birikken Arab ámirliginiń Shardja qalasynda ampýtant jáne arbadaǵy múmkindigi shekteýli azamattar arasyndaǵy búkilálemdik oıyndarda qyzylordalyq Qolǵanat Baqbergen júldeger atandy. Syr sańlaǵy uzyndyqqa sekirýden kúmis medal aldy, dep habarlaıdy QazAqparat tilshisi.

Qyzylorda oblystyq dene shynyqtyrý jáne sport basqarmasynyń baspasóz hatshysy Laýra Shońǵalovanyń habarlaýynsha, atalmysh jarysqa elimizdiń paralımpııalyq ulttyq quramasy sapynda Qolǵanat Baqbergen men Elaman Jolaman qatysyp jatyr. Endi Elaman el namysyn qorǵaıdy.

Atalmysh búkilálemdik oıyndar 1948 jyldan beri turaqty túrde ótkizilip keledi. Ony ótkizýge Anglııadaǵy Stok-Mandevıl qalpyna keltirý gospıtaliniń dárigeri Lıýdvıg Gýttman uıytqy boldy. Sodan beri ol turaqty túrde uıymdastyrylady.

Bıylǵy jarysqa álemniń 50 elinen sportshylar keldi. Búkilálemdik oıyndar 17 aqpan kúni máresine jetedi. Atalmysh oıyn jeńimpazdary bıyl ótetin jeńil atletıkadan múmkindigi shekteýli azamattar arasyndaǵy álem chempıonatyna qatysýǵa joldama alady. Sondaı-aq, 2020 jyly Japonııa astanasy - Tokıo qalasyndaǵy Paralımpııalyq oıyndarǵa qatysý múmkindigine qol jetkizedi.