Qyzylordalyq sportshy álem kýbogynda chempıon atandy

QYZYLORDA. QazAqparat - Qyzylordalyq sportshy Ásemgúl Erdáýlet Horvatııanyń Ýmag qalasynda ótken karate-dodan álem kýbogynda chempıon atandy, dep habarlaıdy QazAqparat tilshisi.

Ol 14-15 jas aralyǵynda jasóspirimder arasynda 47 keli salmaqta synǵa tústi. Qyzylordalyq sportshy atalmysh básekede alty kezdesý ótkizdi.

Aldymen ol Latvııadan kelgen qarsylasyn súrindirse, odan ıtalııalyq, slovakııalyq, kıprlik sportshylardan basym tústi. Ásemgúl jartylaı fınalda rýmyndyq áriptesin qapy qaldyrdy. Al fınalda Iordanııadan kelgen sportshy oǵan qarsy tura alǵan joq.

Endi Ásemgúl álem chempıonatyna qatysady. Dúbirli doda bıyl qazan aıynda Chılıde ótkiziledi.

Budan buryn Ásemgúldiń halyqaralyq týrnırde chempıon atanǵanyn habarlaǵan edik.