Qyzylordalyq sharýalar mashına-traktor parkin jańarta almaı otyr
Sapar barysynda Narıman Ábilshaıyqov palatany reformalaý tásilderin talqylaý úshin transformatsııa jónindegi jumys tobyna kirgen belsendilermen kezdesip, Óńirlik keńes otyrysynda atalǵan máseleni birge talqylady. UKP transformatsııalaý jumys tobynyń múshesi Bolat Nurhojaev palata týraly zańdy ózgertýge berilip jatqan usynystardy durystap saralaý keregin aıtty.
«Biz transformatsııa jasaımyz dep júrip 8 jylda Úkimet pen Prezıdent sanasatyn organ bolǵan uıymnyń jumysyn buzyp almaýymyz kerek», – dedi Bolat Nurhojaev.
Jıynda aımaqtaǵy kásipkerlerdiń problemalary da talqylandy. Sonyń ishinde kásipkerler aýyl sharýashylyǵyna qajetti tehnıkalarǵa beriletin memlekettik qoldaýdy qaıta qaraý qajettigin jetkizdi.
Óńirlik keńes múshesi, «Ysamaddın» sharýa qojalyǵynyń tóraǵasy Janarbek Nurymbetov geosaıası jaǵdaılarǵa baılanysty dollar kýrsynyń ózgerýi aýyl sharýashylyǵy tehnıkalarynyń qymbattaýyna alyp kelgenin atap ótti.
«Buǵan deıin sheteldik kúrish jınaý kombaındarynyń baǵasy 130-140 mln teńge shamasynda bolsa, qazir 170-200 mln teńgege jetti. Memleketten tehnıkalarǵa beriletin ınvestıtsııalyq sýbsıdııanyń erejesin qaıta qaraý kerek. Sebebi tehnıka qunynyń 25 paıyzyna deıin sýbsıdııalaýdy kózdeıtin qoldanystaǵy erejede ruqsat etilgen kólem eski baǵamen kórsetilgen», – dedi Janarbek Nurymbetov.
Kásipkerdiń aıtýynsha, fermerlerdiń budan bólek ýtılalym jáne keden salyǵy, nesıe júktemeleri sekildi mindettemeleri kóp.
Onyń ústine tehnıkanyń qymbattaýy men sýbsıdııanyń azaıýy saldarynan saladaǵy kásipkerler mashına-traktor parkin jańarta almaı otyr.
Óńirlik keńes músheleri «Bastaý Bıznes» jobasyna, paıyzsyz nemese 2 paıyzben nesıe berý, salyqtyq jeńildik jáne kommýnaldyq tólem shyǵyndaryn sýbsıdııalaý, nesıeni ekinshi deńgeıli banktermen qatar shaǵyn qarjy uıymdary arqyly berýge qatysty usynystaryn bildirdi.
«Atameken» ókili kásipkerlerdiń ýájinen habardar ekenin aıtyp, máselelerdiń úkimet deńgeıinde sheshilip jatqanyn jetkizdi.
Sonymen qatar, ol palatanyń qyzmeti men bolashaǵany beıjaı qaramaı, jumys tobyna belsene atsalysqan kásipkerlerge alǵys aıtty.
«Búgingi ekonomıkalyq ahýal kásipkerliktiń barlyq derlik salasyna yqpal etip otyr. Sondyqtan aıtylǵan máselelerdiń bári úkimet deńgeıinde talqylanady. Sondaı-aq, Ulttyq palatanyń transformatsııasyna qatysty usynystar eskerilip, mamyrda qorytyndy qujat ýákiletti organǵa joldanady», – dep qorytyndylady kezdesýdi Narıman Ábilshaıyqov.
Aıta keteıik, palata basqarmasy aımaqtaǵy kásipkerlermen kezdesip, transformatsııalaýǵa qatysty usynystaryn talqylap jatyr.
