Qyzylordalyq shahmatshy Azııa chempıony atandy
QYZYLORDA. QazAqparat - Shrı-Lanka memleketiniń Vakadýva qalasynda shahmattan ótip jatqan jasóspirimder arasyndaǵy Azııa birinshiliginde qyzylordalyq Nazerke Nurǵalı Azııa chempıony atandy, dep habarlaıdy QazAqparat tilshisi.
Nazerke 16 jasqa deıingi qyzdar arasynda rapıd túrinen el namysyn qorǵady. Nátıjesinde altynnan alqa taǵyp, jankúıer senimin aqtady. Qyzylordalyq shahmatshy osylaısha ekinshi mərte Azııa chempıony atanyp otyr.
Sońǵy jyldarda ol halyqaralyq jarysta el namysyn abyroımen qorǵap keledi. 2016 jyly Mońǵolııadaǵy Azııa chempıonatynda 12 jasqa deıingi qyzdar arasynda altyn medal aldy. 2017 jyly Rýmynııada 13 jasqa deıingi Əlem chempıonatynda kúmis júldeger atansa, 2018 jyly Albanııada 15 jasqa deıingi qyzdar arasynda álem chempıony boldy.
Bıyl Nazerke klassıka, rapıdten (16 jasqa deıingiler) jəne blıtsten (20 jasqa deıingiler) el chempıony ataǵyn jeńip aldy. Ol № 1 oblystyq olımpıadalyq rezervtiń mamandandyrylǵan balalar-jasóspirimder mektebinde tálim alady. Bapkeri - Vasılıı Shmelkov.
