Qyzylordalyq sanıtar Qyzyl kitapqa engizilgen úkini qutqardy
NUR-SULTAN. QazAqparat – Qyzylordada sanıtar Qyzyl kitapqa engizilgen úkini qutqaryp, tabıǵatty qorǵaýshylarǵa tapsyrdy. Bul jaıly QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet Facebook paraqshasynda jazdy.
«Qyzylorda oblystyq psıhıkalyq densaýlyq ortalyǵynyń sanıtary Baqytgúl Qarǵabaeva óz jumysynyń mańaıynan usha almaı qalǵan úkini taýyp alǵan. Ol birden alǵashqy kómekti kórsetip, Qyzylorda oblystyq aýmaqtyq orman sharýashylyǵy jáne janýarlar álemi ınspektsııasyna habar bergen», - dep jazady Sáken Dildahmet.
Tabıǵatty qorǵaýshylar jedel veterınarlarmen birge úkini tekserip, túz taǵysynyń eshqandaı zaqym almaǵanyn anyqtapty.
«Jaı-kúıin jaqsartý úshin úki orman sharýashylyǵy jáne janýarlar dúnıesi mekemesine ornalastyryldy. Qyzyl kitapqa engen úki ekeni anyqtaldy. Tabıǵatta sany az», - dep atap ótken ol.
Qyzyl kitapqa engen úkiniń bul túri Eýrazııanyń ár buryshynda taraǵan. Qazaqstannyń ortalyǵynda, shyǵysy, ońtústik-shyǵysy men Betpaqdalasynda, Aral mańynda, Mańǵystaý pen Ústirtte kezdesedi.
«Qazaqstanda úkiniń bul túri ulttyq kıim tigý úshin aýlanatyn. Qystyń qataldyǵy úkige jaısyz tıedi. Osy sebepti, qustyń kóbeıý múmkindigi de az», - dep jazady Sáken Dildahmet.
