Qyzylordalyq polıtsııa sheneýnigi esirtki satýshylarǵa qamqorlyq jasaǵan

NUR-SULTAN. QazAqparat - Qyzylorda oblystyq polıtsııa departamenti esirtki qylmysyna qarsy kúres basqarmasynyń bólim basshysy sybaılas jemqorlyq qylmysyn jasaý kúdigine ilindi. Bul týraly QR Sybaılas jemqorlyqqa qarsy is-qımyl agenttigi 1-shi departamentiniń aǵa tergeýshisi Qaısar Barjaqsynov aıtty, dep habarlaıdy QazAqparat tilshisi.

Onyń atap ótýinshe, Qyzylorda oblystyq sybaılas jemqorlyqqa qarsy qyzmeti atalǵan óńirdiń polıtsııa departamenti ózindik qaýipsizdik basqarmasymen birlesip, esirtki qylmysyna qarsy kúres basqarmasynyń bólim basshysy sybaılas jemqorlyq qylmysyn jasaǵanyn áshkereledi.

«Ol jalpy qamqorlyǵy úshin 500 myń teńge somasynda para alý kúdigine ilindi. QR Qylmystyq is júrgizý kodeksiniń 201-babyna sáıkes tergeý múddesi úshin ózge aqparat jarııalanbaıdy», - dedi ol agenttiktiń baspasóz qyzmeti alańynda ótken brıfıngte.