Qyzylordalyq polıtseıler jolda qalyp qoıǵan jolaýshylarǵa kómektesti
Atalmysh oqıǵa «Samara-Shymkent» tasjolynyń boıynda bolǵan. Jergilikti polıtsııa qyzmeti basqarmasynyń qyzmetkerleri, polıtsııa aǵa leıtenanttary Aıabek Qurbanov pen Ádilseıit Qalaǵanov Qarmaqshy aýdanynda kezekti patrýldeý sharasyn ótkizip júrgende joldyń 1620-shaqyrymy tusynda jol jıeginde turǵan «GAZel» markaly avtokólikti baıqaıdy.
«Onda 3 jolaýshy bar eken. Kólik tehnıkalyq aqaý saldarynan jolda toqtap qalǵan. Aýa raıynyń sýyq bolýyna baılanysty jolaýshylar tońyp qalǵan. Polıtsııa qyzmetkerleri olarǵa dereý kómek kórsetti. Buzylǵan avtokólikti Qarmaqshy aýdanyndaǵy Qorqyt ata keshenine deıin súırep alyp bardy», - dep málim etti Qyzylorda oblystyq polıtsııa departamentiniń baspasóz qyzmeti.
Qazirgi kúni Qyzylorda oblysynda aýa raıy qolaısyz. Polıtsııa qyzmetkerleri oqys oqıǵalardyń aldyn alý maqsatynda kúsheıtilgen kezekshilik qyzmetin atqaryp júr.