Qyzylordalyq polıtseıler jolda qalyp qoıǵan 724 jolaýshyǵa kómektesti
QYZYLORDA. QazAqparat - Qyzylordalyq polıtseıler jolda qalyp qoıǵan 600-den astam kóliktiń júrgizýshileri men jolaýshylaryna kómek kórsetti. Bul jóninde Іshki ister mınıstrliginiń baspasóz qyzmetine silteme jasap QazAqparat habarlaıdy.
10 jeltoqsan kúni keshki saǵat 18:30-dan bastap «Samara - Shymkent» tasjolynyń 1240 – 1646 shaqyrymynda, ıaǵnı Qyzylorda oblysy Qarmaqshy aýdanynan Aqtóbe oblysynyń shekarasyna deıingi aralyqta aýa raıynyń qolaısyzdyǵyna barlyq kólik túrleriniń qozǵalysyna shekteý qoıyldy. Qyzylorda oblysy polıtsııa departamentiniń qyzmetkerleri oqys oqıǵanyń aldyn alý úshin táýlik boıy «Batys Eýropa – Batys Qytaı» halyqaralyq avtomobıl jolyn patrýldep, dereý kúsheıtilgen kezekshilikke kóshti.
«Jol qaýipsizdigin qamtamasyz etý maqsatynda polıtsııa qyzmetkerleri joldyń 400 shaqyrym aralyǵyn jaýyp, táýlik boıy jumys istedi. Nátıjesinde 440 júk kóligi, 156 jeńil jáne 10 qoǵamdyq kólikke kómek kórsetti. Jalpy 600-den astam kóliktiń 724 jolaýshysyna, onyń ishinde 240-qa jýyq áıel men 35 balaǵa kómek kórsetildi. Kezekshilik jasap júrgen polıtsııa qyzmetkerleri olardy jaqyn mańdaǵy keshenderge jetkizip, ystyq tamaqpen qamtamasyz etip, jaıǵastyrdy» delingen habarlamada.
Ártúrli tehnıkalyq aqaýǵa baılanysty turyp qalǵan avtokólik júrgizýshileri men jolaýshylaryna alǵashqy kómek kórsetip, kólik aqaýyn jóndeý úshin jaqyn mańda ornalasqan keshenderge jetkizdi.
Kólikter avtoturaqtarǵa qoıyldy. Kóktaıǵaq saldarynan qoıylǵan shekteýge baılanysty 6 polıtsııa ekıpajy táýlik boıy jumys istedi.
Búgin jergilikti ýaqytpen saǵat 07:00-den bastap kóktaıǵaqqa baılanysty jabylǵan jol ashylyp, qozǵalys qaıta jandandy. Júrgizýshiler men jolaýshylar saparyn ári qaraı jalǵastyrdy.
Qazirgi tańda respýblıkalyq mańyzy bar tasjolda polıtseıler táýlik boıy kúsheıtilgen rejımde jumys istep jatyr.
