Qyzylordalyq polıtseıler: Jolaýshylarǵa qol ushyn sozý – azamattyq mindetimiz
QYZYLORDA. QazAqparat - Jolda qalyp qoıǵan júrgizýshilerge qol ushyn sozǵan qyzylordalyq polıtseıler ony ózderiniń azamattyq mindeti sanaıdy, dep habarlaıdy QazAqparat tilshisi.
Esterińizge sala ketelik, budan buryn Qyzylorda oblysy aýmaǵynda júk kóligi buzylyp qalǵan júrgizýshilerge kómektesken polıtsııa qyzmetkerleri jóninde habarlaǵan edik.
«Samara-Shymkent» trassasynyń 1688-shaqyrymynda jol jıeginde «HOWO» júk kóligi buzylyp, toqtap qaldy. Júk kóligi Aqtóbeden Almatyǵa bet alyp bara jatqan bolatyn.
Sol ýaqytta oblystyq polıtsııa departamentiniń patrýl polıtsııa rotasynyń ınspektorlary Nurmuhanmed Musalımov pen polıtsııa aǵa leıtenanty Qaırat Seıit jol boıynda ózderiniń jumysyn atqaryp júrdi.
«Qyzylorda oblysynyń aýmaǵynan «Batys Qytaı - Batys Qytaı» kólik dálizi ótedi. Shyǵys pen Batystyń arasyn jalǵaǵan kúre joldyń 700 shaqyrymnan astamy bizdiń aýmaqta jatyr. Oblystyq polıtsııa departamentine qarasty patrýl polıtsııa rotasy sol aýmaqta qyzmet atqarady. Kúndelikti jumys barysynda kóptegen oqıǵalarǵa kezigip jatamyz. Tipti, mundaı jaǵdaılar kúnde qaıtalanady desek te artyq emes. Olardyń barlyǵyn este saqtaı bermeımiz. Óıtkeni, ol - bizdiń eń aldymen azamattyq mindetimiz», - dedi Qaırat bizben áńgimesinde.
Qaırat bul oqıǵany da solardyń qataryna jatqyzady. Alaıda, qol ushyn sozǵan azamattardyń alǵysyna ıe bolǵanyna qýanyshty ekenin jasyrǵan joq.
«Polıtsııa qyzmeti osyndaı qaýyrt tirshilikte ótip jatady ǵoı. Ózimiz osy mamandyqty tańdap keldik. Sondyqtan árbir isimizge jaýapkershilikpen qaraımyz. Árıne, istegen isimizge azamattar tarapynan alǵys estip jatsaq, oǵan qýanyshymyz erekshe. Atalǵan oqıǵa barysy bylaı bolǵan edi. Ol azamattar mingen «HOWO» júk kóligi birneshe kún boıy jol boıynda buzylyp turdy. Kólik buzylǵan alǵashqy kúnniń ózinde olarǵa kómektesý jaǵyn oıladyq. Degenmen olar bizdiń kómegimizden bas tartyp, kólikti ózderi jóndep alatynyn jetkizdi. Osylaısha eki-úsh kún ótip ketti. Aqyrynda avtokólikti Qarmaqshy aýdanyndaǵy ІІІ Internatsıonal eldi mekeniniń janyndaǵy «Aqsaraı» keshenine evakýatsııalaýǵa kómek kórsettik», - dedi ol.
Atalǵan orynda jolaýshylar tamaqtanyp, ári qaraı Qyzylorda qalasyna deıin keldi. Qazirgi ýaqytta avtokólik atalǵan keshende jóndeýde tur. Jóndelgennen keıin ony kólik ıesi alyp ketedi.
«Kóligi buzylǵan azamat Almaty oblysynda turady. Almatyǵa barǵannan keıin elimizdiń ishki ister mınıstriniń atyna bizge alǵys hat kelip túsipti. Almaty turǵynynyń jubaıy kúıeýine qol ushyn sozǵany úshin bizge rızashylyǵyn bildirgen eken» deıdi polıtseıler.
Nurmuhanmed Musalımov te áriptesiniń aıtqanyna qosylyp, jolaýshylarǵa qol ushyn sozý azamattyq jáne qyzmettik mindeti ekenine nazar aýdardy.
Nurmuhanmed Musalımov polıtsııada 2014 jyldan beri qyzmet atqaryp keledi. Al Qaırat Seıittiń polıtsııa qyzmetine kelgenine bıyl segiz jyl toldy.
