Qyzylordalyq polıtseıler shyrsha oıynshyǵyn urlamaq bolǵan azamatty ustap aldy
QYZYLORDA. QazAqparat-Ótken túnde qalalyq ishki ister basqarmasynyń Jedel basqarý ortalyǵynyń kezekshi-ınspektory beınekamera arqyly aýmaqty sholý barysynda ortalyq alańda ornalasqan shyrshanyń oıynshyqtaryn urlap alyp, jeke avtokóligine minip, oqıǵa ornynan izin sýytpaq bolǵan azamatty baıqap qalady. Oqıǵa ornyna dereý polıtsııa jasaǵy jiberilip, nátıjesinde 1982 jyly týǵan qala turǵyny ustaldy. Bul týraly QazAqparat HAA tilshisi oblystyq ІІD silteme jasap habarlady. Qazirgi tańda atalǵan derek boıynsha sotqa deıingi tergep-tekserý amaldary júrgizilýde.
Aıta keterlik jaıt, Qyzylorda oblysy ortalyǵynda quqyq buzýshylyqtar men qylmystardyń aldyn alý, oryn alǵan urlyq qylmystaryn der kezinde ashý men jol qozǵalysy erejesin buzǵandardy anyqtaý maqsatynda adam kóp shoǵyrlanatyn oryndarǵa beınebaqylaý kameralary ornatylyp, zańbuzýshylyqtardy anyqtaýda septigin tıgizip keledi. Jalpy oblys ortalyǵynda 272 beınekamera bar bolsa, olardyń barlyǵy Qyzylorda QІІB-niń Jedel basqarý ortalyǵyna qosylǵan. Jyl basynan beri atalǵan beınekameralardyń kómegimen 8 qylmystyń beti ashylyp, 1606 ákimshilik quqyq buzýshylyq anyqtaldy.
