Qyzylordalyq polıtseıler koronavırýsqa qarsy vaktsına ala bastady

QYZYLORDA. QazAqparat - Qyzylorda oblysynda polıtseıler koronavırýsqa qarsy vaktsına saldyra bastady, dep habarlaıdy QazAqparat tilshisi.

Oblystyq Polıtsııa departamentiniń qyzmetkerleri naýryz aıynan bastap qaterli indetke qarsy ekpe qabyldaı bastady. Ony uıymdastyrý sharalary oblystyq Densaýlyq saqtaý basqarmasy jáne oblystyq Sanıtarlyq-epıdemıologııalyq baqylaý departamenti tarapynan jasalǵan jospar negizinde júrgizilýde.

Aıta keterligi, pandemııa kezeńinde oblystyq Polıtsııa departamentiniń 26 qyzmetkeri koronavırýs ınfektsııasyn juqtyrǵan. Qazir vırýsqa shaldyqqan naýqastar joq.

«Óńirde 10 naýryzdan bastap polıtsııa qyzmetkerlerin vaktsınalaý bastaldy. Odan buryn polıtsııa qyzmetkerlerimen aýdıoselektorlyq rejımde aqparattyq-túsindirý jumystary júrgizildi», - dedi oblystyq Polıtsııa departamentiniń emhana bastyǵy Dınara Ámirseıitova.

Ekpe egý oblys ortalyǵyndaǵy №1, 3 jáne 6 emhanalarda júrgizilýde. Alǵashqy kezekte halyqpen kúndelikti tikeleı baılanysta qyzmet atqaratyn ýchaskelik polıtseıler vaktsınalanýda. Qyzylorda oblysy Polıtsııa departamentiniń basshylyq quramy da ekpe saldyrdy.

«Bul – alǵashqy kezekte dárigerlermen qatar aldyńǵy shepte turatyn polıtseıler úshin qajetti shara. Sebebi, biz úshin jeke quramnyń qaýipsizdigi óte mańyzdy», - dedi Departament bastyǵynyń orynbasary Dáýren Ibraev.