Qyzylordalyq polıtseıler esirtkini zańsyz tasymaldaǵan 2 azamatty quryqtady
QYZYLORDA. QazAqparat - Aǵymdaǵy jyldyń qańtar aıynyń 09-11 kúnderi aralyǵynda jergilikti polıtsııa qyzmetiniń ýchaskelik polıtsııa ınspektorlary esirtki zattaryn ótkizý maqsatynsyz zańsyz saqtaý, tasymaldaýdyń 2 deregin anyqtady, dep habarlady QazAqparat HAA tilshisi oblystyq ІІD silteme jasap.
Atap aıtqanda, 2017 jyldyń 9 qańtarynda saǵat 19.00-de Jańaqorǵan aýdandyq ishki ister bóliminiń ýchaskelik polıtsııa ınspektory Ǵ.Álimbetov ózine bekitilgen aýmaqta barlaý jumystaryn júrgizý kezinde mas kúıinde júrgen 1969 jyly týylǵan azamatty toqtatyp, tekserý barysynda kúrteshesiniń qaltasynan gazet qıyndysyna oralǵan jasyl tústi, erekshe ıisi bar zatty anyqtaıdy. Tıisti tekserý jumystary júrgizilip, belgisiz zatqa saraptama taǵaıyndaldy. Nátıjesinde, salmaǵy 1,96 gramdy quraıtyn «keptirilgen marıhýana» ekendigi belgili boldy.
Dál osyndaı derek Jalaǵash aýdanynda da tirkeldi. 2017 jylǵy 11 qańtarda saǵat 20.30 shamasynda ishki ister bóliminiń ýchaskelik polıtsııa ınspektory D.Toqmuratov is-áreketi kúdik týdyrarlyq azamatty baıqap qalady. Toqtatyp, tekserý barysynda 1982 jyly týylǵan aýdan turǵynynyń kıiminiń oń qaltasynan gazet qıyndysyna oralǵan ózine tán erekshe ıisi bar, jasyl tústi shóp tárizdes zat alyndy.
Eki derek boıynsha Qazaqstan Respýblıkasy Qylmystyq kodeksiniń 296-baby 2-bóligi boıynsha qylmystyq is qozǵalyp, sotqa deıingi tergeý jumystary júrgizilýde.
