Qyzylordalyq polıtseıler esirtki zatyn zańsyz saqtaǵan 2 azamatty qolǵa túsirdi
QYZYLORDA. QazAqparat - Aqpan aıynyń 6-10 kúnderi ótkizilip jatqan «Tranzıt» jedel profılaktıkalyq is-sharasy barysynda qyzylordalyq polıtseıler esirtki zatyn zańsyz saqtaýdyń, satýdyń 2 deregin anyqtady, - dep habarlady QazAqparat HAA tilshisi oblystyq ІІD-ge silteme jasap.
Oqıǵa 2017 jyldyń 7 aqpanynda saǵat 18.00 shamasynda oryn alǵan. QR ІІM-niń Baıqońyr qalasyndaǵy ókildiginiń qyzmetkerleri júris-turysy kúdik týdyrarlyq 1967 jyly týǵan Tóretam kentiniń turǵynyn toqtatyp, tekserý barysynda kúrteshesiniń qaltasynan aq qaǵazǵa oralǵan jasyl tústi, erekshe ıisi bar zatty anyqtaıdy. Tıisti tekserý jumystary júrgizilip, belgisiz zatqa saraptama taǵaıyndaldy. Saraptama qorytyndysy boıynsha salmaǵy 1,59 gr.-dy quraıtyn «marıhýana» esirtki zaty ekendigi anyqtaldy. Atalǵan derek boıynsha QR Qylmystyq kodeksiniń 296-baby 2-bóligimen qylmystyq is qozǵaldy.
Dál osyndaı derek Jańaqorǵan aýdanynda da tirkeldi. 2017 jylǵy 7 aqpanda Jańaqorǵan aýdandyq ishki ister bóliminiń qyzmetkerleri salmaǵy 49,48 gr.-dy quraıtyn «marıhýana» esirtki zatyn 10000 teńgege satpaq bolǵan 1974 jyly týǵan azamatty ustady. Sonymen qatar, tekserý sharalary barysynda atalǵan azamattyń úıine tintý júrgizilip, 2 gazet qıyndysyna oralǵan jasyl tústi, erekshe ıisi bar zatty anyqtady. Saraptama taǵaıyndalyp, qorytyndysy boıynsha ol 0,13 gr. «marıhýana» ekendigi belgilendi.
Ustalǵan azamat ýaqytsha ustaý ızolıatoryna qamaqqa alynyp, oǵan qatysty Qazaqstan Respýblıkasy Qylmystyq kodeksiniń 296-baby 2-bóligi jáne 297-baptyń 1-bóligi boıynsha qylmystyq is qozǵalyp, sotqa deıingi tergep-tekserý jumystary júrgizilýde.
