Qyzylordalyq polıtseıler 3 keliden asa esirtki zatyn saqtaǵan azamatty quryqtady
QYZYLORDA. QazAqparat - Oblys aýmaǵynda ótkizilip jatqan «Órmek» jedel-profılaktıkalyq is-sharasy barysynda Qyzylorda OІІD Esirtki bıznesine qarsy kúres basqarmasynyń qyzmetkerleri esirtki zatyn asa iri kólemde saqtap júrgen Qyzylorda qalasynyń 1974 jyly týylǵan turǵynyn anyqtap, quryqtady. Bul týraly QazAqparat HAA tilshisi oblystyq ІІD silteme jasap habarlady.
Kúdiktiniń úıine tekserý jumystary júrgizilip, nátıjesinde esirtki zatyn paıdalanýǵa arnalǵan qural, ydysqa salynǵan sora ósimdiginiń tuqymy, gazet qıyndysyna oralǵan jasyl tústi, ózine tán erekshe ıisi bar ósimdik tektes zat jáne esirtkige uqsas zat salynǵan sómke anyqtaldy. Atalǵan zattar aıǵaq retinde alynyp, tıisti saraptama taǵaıyndaldy. Saraptama qorytyndysymen 3 kg 425,17 gramdy quraıtyn «keptirilgen marıhýana» ekendigi belgili boldy.
Qazirgi tańda atalǵan derek boıynsha Qazaqstan Respýblıkasy Qylmystyq kodeksiniń 296-baby 4-bóligimen qylmystyq is qozǵalyp, sotqa deıingi tergep-tekserý amaldary júrgizilýde. Kúdikti tulǵa oqıǵa ornynan ustalyp, qalalyq ishki ister basqarmasynyń ýaqytsha ustaý oqshaýlaǵyshyna qamaýǵa alyndy.
