Qyzylordalyq palýandar - erkin kúresten QR chempıonatynyń jeńimpazdary
QYZYLORDA. QazAqparat- Shymkentte grek-rım, erkin jáne áıelder kúresinen Qazaqstan Respýblıkasynyń chempıonaty ótti.
Aıtýly jarysta Qyzylorda oblystyq joǵary sport sheberligi mektebi men Olımpıadalyq rezerv daıarlaý ortalyǵynda tálim alatyn sportshylar tabysty óner kórsetti, dep habarlady QazAqparat HAA tilshisi oblystyq dene shynyqtyrý jáne sport basqarmasyna silteme jasap.
Jarys qorytyndysynda erkin kúresten óner kórsetken jerlesterimiz 2 altyn, 1 qola medalmen jalpykomandalyq esepte birinshi oryndy ıelendi.
Atap aıtsaq, 61 keli salmaq dárejesinde synǵa túsken Dáýlet Nııazbekov pen 74 kelide Ǵalymjan Óserbaev Qazaqstan chempıony atansa, 70 kelide Qanat Musabekov qola júldege ıe boldy.
Erkin kúresten oblystyń aǵa jattyqtyrýshysy Ábýtálip Amanovtyń aıtýynsha, sportshylar endi Bolgarııada ótetin oqý-jattyǵý jıynyna qatysady. Odan keıin halyqaralyq týrnırde baq synaıtyn bolady.
Al áıelder kúresinen 55 kelide Gúlsim Qazanova men 75 kelide Azıza Turmaǵanbet qola júldeni enshiledi.
Grek-rım kúresinen 59 kelide Aıdos Sultanǵalı men 66 kelide Aıdos Súleımen - kúmis, 71 kelide Aıdos Muqan qola júldelerge qol jetkizdi.
