Qyzylordalyq palýan belbeý kúresinen álem chempıonatynyń kúmis júldesin ıelendi
QYZYLORDA. QazAqparat-Reseıdiń Naberejnye Chelny qalasynda belbeý kúresinen ótken Álem chempıonatynda jerlesimiz, Shıeli aýdanynyń týmasy Raıymbek Rantaev kúmis júldeni ıelendi. Bul týraly QazAqparat tilshisi oblystyq dene shynyqtyrý jáne sport basqarmasyna silteme jasaı otyryp habarlady.
62 keli salmaq dárejesinde óner kórsetken Raıymbek halyqaralyq dárejedegi sport sheberi normatıvin oryndady.
Rantaev1996 jyly Shıeli aýdanynda dúnıege kelgen. Ol bıylǵy jyly Astana qalasynda belbeý kúresinen eresekter arasynda ótken Qazaqstan chempıonatynyń jeńimpazy atansa, Jańaqorǵan aýdanynda Qazaqstan kýbogyn ıelendi. Túrkimenstannyń Ashhabad qalasynda eresekter arasynda Azııa chempıonatynyń kúmis júldesin enshiledi. Jasóspirimder jáne jastar arasynda Qazaqstan chempıonatynyń jeńimpazy.
Sondaı-aq, qazaq kúresinen jasóspirimder arasynda eki márte Qazaqstan chempıonatynyń jeńimpazy, Álem chempıonatynyń qola júldegeri (Brazılııa, 2012 j.). QR sport sheberi. Jattyqtyrýshylary: Ǵabıt Tájbenov, Meırambek Tájbenov.
Ol Qorqyt ata atyndaǵy QMÝ-niń «Dene shynyqtyrý jáne sport» mamandyǵy boıynsha 3-kýrsta oqıdy.
Atalǵan álem chempıonatyna 42 memlekettiń sportshylary baq synasty.
