Qyzylordalyq órtenip jatqan úıden 2 balany qutqaryp qaldy
QYZYLORDA. QazAqparat – Qyzylordalyq Nursulý Padanova eki búldirshin qyzdy órtten qutqaryp qaldy, dep habarlaıdy QazAqparat tilshisi.
«Aqmeshit» shaǵyn aýdanyndaǵy bes qabatty turǵyn úıdegi páterlerdiń birinde búldirshinder ata-anasynyń baqylaýynsyz qalǵan kezde úıden órt shyqqan.
Qutqarýshylar jetkenshe janyp jatqan páterden búldirshinderdi kórshisi Nursulý Padanova alyp shyqqan.
«Ózimniń páterimde as bólmesinde júrgen edim. Joǵary qabattaǵy kórshi páterden eki búldirshin qyzdyń qutqaryńdar degen daýysyn qulaǵym shaldy. Oqıǵa barysyn baıqasam, páter ishinen tútin shyǵyp jatqany ańǵarylady. As bólmesindegi tereze arqyly joǵary qabatqa shyǵýǵa sheshim qabyldadym. Oryndyq jáne basqa dúnıelerdi paıdalanyp joǵary qabattaǵy páterge jettim. Aldymen Inaıatty, odan keıin Nurdanany qutqardym», - dedi Nursulý Padanova.
Nursulý Padanova «Arnaýly áleýmettik qyzmetter kórsetý balalar ortalyǵynyń» defektolog-maman bolyp qyzmet atqarady. Joldasy ekeýi tórt bala ósirip otyr.
Aman qalǵan búldirshinderdiń anasy Gúlhan Seıdildáqyzy Nursulýǵa alǵys bildirdi.
Budan buryn 3-qabattan sekirmek bolǵan qyzylordalyq qutqarylǵanyn habarlaǵan edik.
