Qyzylordalyq órender robot qurastyryp júr
QYZYLORDA. QazAqparat - Qyzylordada alǵash ret «Ata-anam, men jáne robot» atty oblystyq otbasylyq-tanymdyq chempıonat ótkizildi, dep habarlaıdy QazAqparat tilshisi.
Oǵan aýdandar men Qyzylorda qalasynan barlyǵy on komanda qatysty. Saıysqa arnaıy robototehnıka úıirmesinde qurastyrǵan robottaryn alyp kelgen órender erekshe yqylas tanytty.
Áýeli tóreshiler balalardyń robottaryn arnaıy talaptarǵa saı kólemi men salmaǵyn, baǵdarlamasyn tekserýden ótkizdi. Qatysýshylardyń eń kishisi jeti jasta. Soǵan qaramastan árbir saıys tartysty boldy. Órender úsh kezeńnen turatyn «Robosýmo» saıysy boıynsha synǵa tústi.
Sharaǵa bastaýysh synyp oqýshylarmen qatar ata-analar da qatysty. Bul otbasyndaǵy ózara qarym-qatynastyń nyǵaıýyna erekshe áser eteri anyq. 
Saıys nátıjesinde Asylbek Bekmoldaev birinshi oryndy ıelense, Qýanysh Nuráli men Ánýar Aıbergen ekinshi oryndy ózara bólisti. Al úshinshi orynǵa Erbolatqyzy Gúlzınat, Ahmetov Jarqynbek pen Adyrbaı Álıhan laıyq dep tanyldy.
Aıta keteıik, saıystyń ótýine «Kazrobotıks» bilim berý jáne sporttyq robototehnıkasynyń Qazaqstan Federatsııasy respýblıkalyq qoǵamdyq birlestigi, «Smart Generation» robototehnıka mektebi men oblystyq «Rýhanı jańǵyrý» ortalyǵy jáne oblystyq bilim basqarmasy uıtqy boldy.
