Qyzylordalyq ónertapqyshtyń jobasyna japondar joǵary baǵa berdi
QYZYLORDA. QazAqparat - Qyzylorda qalasynda turatyn ónertapqysh Uljan Ábýova jas adamdardyń beınesi men daýysyn ajyratyp, ózine mindettelgen tapsyrmalardy múltiksiz oryndap shyǵa alatyn «Aqtós» atty robot-kúshikti qurastyryp shyǵardy, dep habarlaıdy QazAqparat tilshisi.
Uljan jas kezinen bul salaǵa erekshe qyzyǵýshylyq bildirip keledi. Sol maqsatta Qorqyt ata atyndaǵy Qyzylorda memlekettik ýnıversıtetinde ınformatıka mamandyǵy boıynsha bilim aldy. Joǵary oqý ornynda oqyp júrgende baǵdarlamalaý sharalaryna erekshe nazar aýdarǵan ol robottehnıka salasyna basa nazar aýdardy. Osynyń nátıjesinde magıstrlik dıssertatsııasyn qorǵaý kezinde osy jobany el nazaryna usyndy.
«Oǵan «Aqtós» degen ataý berdim. Jobany qorǵaý barysynda bul robottyń qalaı jumys isteıtinin kórsettim. Alǵa qaraı adymdap basatyn robot mıkrokontrollermen servomotorlardy basqarý arqyly qurastyryldy. Jobamdy kúshik pishindi túrde júrgizýge mán berdim. Ol kedergilerden aınalyp óte alady. Qashyqtyqtan da basqarý múmkindigi jasalǵan. Árıne, men ony áli de jetildirý ústindemin», - deıdi Uljan Ábýova.
Aldaǵy ýaqytta robottyń daýys pen bet álpetti tanı bilýi úshin qajeti jumystar qolǵa alynyp jatyr. Aıta keterligi, ony úı kúzetýge paıdalanýǵa bolady. Syrttan kelgen adamdardyń beınesi men daýysyn ajyrata alady.
Bul joba Japonııada ótken halyqaralyq baıqaýda 22 jobanyń ishinde úzdik dep tanyldy. Oǵan sol eldiń ǵalymdary joǵary baǵa berdi. Uljan Japonııaǵa barǵanynda ol eldegi robot qurastyratyn kompanııalardyń jumysymen tanysyp qaıtty.
Qazirgi tańda Uljan Ábýova Qyzylorda qalasyndaǵy M.Mámetova atyndaǵy pedagogıkalyq kolledjde dáris berip keledi. Ol óz shákirtterine robottehnıkanyń qyr-syryn úıretip júr.
Ádiljan Úmbet
