Qyzylordalyq ónertapqysh balamaly energııa kózin tapty
Otyz jastaǵy ónertapqysh ózi jasap shyǵarǵan qozǵaltqyshtyń óndiriste ónimdilikti arttyratynyna senedi. Onyń oıynsha osy jetistiktiń nátıjesinde úlken qalalardaǵy ekologııalyq ahýaldy jaqsartýǵa múmkindik týady.
Ónertapqysh bul jobany bes jyldan beri josparlap júrgen. Aldymen ıdeıasyn qaǵaz betine túsirip, onyń formýlasyn jasap shyǵardy. Qurylǵy sýmen qýat óndire alady. Sol arqyly iri óndiris oshaqtaryn jaryqpen qamtamasyz etýge ábden bolady. Ónertapqysh atalmysh jobany jasaýǵa belsene kiristi. Tipti, onyń birneshe nusqasy jasalyp shyqty.
«Aıta keteıin, men bul jobanyń qyryqqa tarta nusqasyn jasadym. Kóptegen qatelikterge kózim jetti. Bul baǵytta birneshe synama jasap kórdim. Qurylǵy tek elektr qýatyn óndirip qoımaıdy. Ol sýmen qamtýǵa da múmkindik týǵyzady. Osylaısha, ony eki fýntsııany atqarýǵa paıdalanýǵa bolady», - dedi Marat Palmahov.
Onyń aıtýynsha, bul qurylǵyny shalǵaı eldi mekenderde elektr qýatymen jabdyqtaý maqsatynda paıdalanýǵa bolady. Sondaı-aq, bıik jerde ornalasqan egis alqaptaryn atalǵan quraldy paıdalaný arqyly sýarýǵa múmkindik bar. Ol klımattyq jaǵdaıǵa eshbir táýeldi emes. Oǵan kúnniń sáýlesi men jeldiń kúshiniń qajeti joq. Sý kózi men onyń saǵasy bolsa jetip jatyr. Sondyqtan artyq shyǵyn ketpeıdi.
Ónertapqysh bul maqsatta patent alýdy oılastyryp júr. Ekologııalyq taza qurylǵy aldaǵy ýaqytta óndiriske engiziletinine senedi.